کاروبار

پیٹرولیم مصنوعات سستی ملیں تو آئندہ بھی روس سے خریدیں گے: مصدق ملک

09 مئی ، 2023

فی الحال پہلی کھیپ آنے پر جائزہ لیں گے کہ روسی تیل کس قدر ضروریات پوری کرتا ہے: مصدق ملک/ فائل فوٹو

وزیر مملکت برائے پیٹرولیم مصدق ملک نے کہا ہےکہ جہاں سے سستا تیل ملا ہم خریدیں گے۔

مصدق ملک نے یہ بات فرانسیسی خبرایجنسی کو انٹرویو میں کہی۔ اس سوال پر کہ کیا پاکستان مستقبل میں بھی روسی تیل خریدنے کا ارادہ رکھتا ہے؟

وزیر مملکت نے کہا کہ اگر ہمیں آج کہیں سے بھی سستا تیل ملے تو پاکستان وہیں سے تیل خریدے گا فی الحال پہلی کھیپ آنے پر جائزہ لیں گے کہ روسی تیل کس قدر ضروریات پوری کرتا ہے۔

انہوں نے کہا کہ روس سے تیل کی خریداری کے لیے پہلا آرڈر دے دیا ہے، روسی تیل کی پہلی کھیپ ایک ماہ میں پاکستان پہنچ جائےگی، پھر نتائج کے مطابق فیصلہ کریں گے کہ روسی تیل کہاں استعمال میں لایا جاسکتا ہے۔

وزیر مملکت کا کہنا تھا کہ پیٹرولیم مصنوعات سستے داموں میں ملتی ہیں تو آئندہ بھی روس سے تیل خریدیں گے، دیگر ملکوں کے مقابلے میں روس کے ساتھ پاکستان کا لین دین محدود رہا ہے، بہت سے ملک قانونی طریقے سے روس سے پیٹرولیم مصنوعات خریدرہے ہیں اور روسی تیل کی خرید سے متعلق امریکا یا کسی اور ملک کے ساتھ کوئی مسائل درپیش نہیں آئے، روسی تیل کی خرید میں پاکستان کا حصہ ایک قطرےکی مانندہے مگر مددگار ہے۔

دوسری جانب خبرایجنسی کے مطابق آبادی کے لحاظ سے دنیا کا پانچواں بڑا ملک پاکستان توانائی کے شدید بحران سے دوچار ہے، پاکستان پیٹرولیم ضروریات کا 84 فیصد حصہ درآمد کرتا ہےجس میں سے زیادہ تر عرب ممالک سے حاصل کیا جاتا ہے۔