کینیا: دنیا کا معمر ترین ببر شیر ’لون کیٹو‘ چرواہوں کے حملے میں ہلاک

جنوبی کینیا کے ایمبوسلی نیشنل پارک کے سرحدی گاؤں میں دنیا کا معمر ترین ببر شیر لون کیٹو (Loonkiito) چرواہوں کے حملے میں ہلاک ہو گیا۔

غیر ملکی میڈیا کے مطابق شیروں کے بچاؤ کیلئے کام کرنے والے گروپ لائن گارجن کا کہنا ہے کہ دنیا کا معمر ترین سمجھا جانے والا ببر شیر لون کیٹو جنوبی کینیا کے ایمبوسلی نیشنل پارک کے سرحدی گاؤں میں چرواہوں کے حملے میں ہلاک ہو گیا ہے۔

لائن گارجین کے مطابق لون کیٹو کی عمر 19 سال تھی جبکہ عام طور پر ببر شیر صرف 13 سال تک جی پاتے ہیں، وہ ہمارے ایکو سسٹم کا معمر ترین شیر تھا۔

لائن گارجین ٹیم کا کہنا تھا کہ رات کے وقت لون کیٹو نے گاؤں میں مویشیوں پر حملہ کردیا تھا جس دوران چرواہوں نے مل کر شیر کو ہلاک کردیا تھا۔

واضح رہے کہ افریقی ببر شیروں کا شمار ایسے جانوروں میں ہوتا ہے جن کی نسل معدومیت کے خطرے سے دوچار ہے، ورلڈ وائلڈ لائف فیڈریشن کے مطابق دنیا میں باقی رہ جانے والے ببر شیروں میں اکثر افریقا میں پائے جاتے ہیں جبکہ ان کی قلیل تعداد بھارت میں بھی موجود ہے۔