کاروبار

پاکستان کے آئی ایم ایف سے بیل آؤٹ کے حصول کے امکانات دھندلانے لگے: موڈیز

14 جون ، 2023

امکانات پیدا ہو گئے ہیں پاکستان رواں برس جون میں ختم ہونے والا اپنا آئی ایم ایف پروگرام مکمل نہیں کر پائے گا: موڈیز — فوٹو: فائل

بین الاقوامی ریٹنگ ایجنسی موڈیز نے کہا ہے کہ پاکستان کے عالمی مالیاتی ادارے (آئی ایم ایف) سے بیل آؤٹ پیکج کے حصول کے امکانات کم ہو رہے ہیں۔

موڈیز کی انویسٹر سروسز کا کہنا ہے پاکستان کیلئے آئی ایم ایف کے 6.7 ارب ڈالرز کے بیل آؤٹ پیکج کے حصول امکانات میں کمی کے بعد ملک کے دیوالیہ ہونے کے خطرات پیدا ہو گئے ہیں۔

سنگاپور کی ریٹنگ کمپنی میں تجزیہ کار ڈاکٹر گریس لم کا کہنا ہے کہ اس بات کے امکانات بڑھ گئے ہیں کہ تجدید نہ ہونے کے باعث پاکستان رواں برس جون میں ختم ہونے والا اپنا آئی ایم ایف پروگرام مکمل نہیں کر پائے گا، مالی ذخائر کی کمی کے باعث آئی ایم ایف کی مدد کے بغیر پاکستان ڈیفالٹ کر سکتا ہے۔

پاکستان 2 ارب ڈالرز کے مالیاتی فرق اور ایکسچینج ریٹ پالیسی جیسی رکاوٹوں کے باوجود آئی ایم ایف پروگرام کی تجدید کیلئے آخری کوشش کر رہا ہے، حکومت کی جانب سے اربوں کے قرضوں کی ادائیگی کی ضمانت دی جا رہی ہے تاہم گزشتہ برس سے ڈالر بانڈ ٹریڈنگ کی پریشان کن صورتحال کے باعث سرمایہ کار تحفظات کا شکار ہیں۔

پاکستان کو آئندہ مالی سال 2024 کیلئے بیرونی قرضوں کی مد میں 23 ارب ڈالرز کی ادائیگیاں کرنی ہیں جوکہ پاکستان کے مالی ذخائر سے پانچ گنا زیادہ ہیں اور مذکورہ ذخائر کثیر الجہتی اور دو طرفہ ذرائع سے حاصل کردہ ہیں۔

اسٹیٹ بینک آف پاکستان کے گورنر جمیل احمد نے قرضوں کی ری اسٹرکچرنگ کے حوالے سے گردش کرنے والی خبروں کی تردید کردی تھی، پاکستان کو جون تک 900 ملین ڈالرز قرضوں کی مد میں ادائیگیاں کرنی ہیں اور توقع ہے کہ 2.3 ارب ڈالر کے قرضے رول اوور ہوجائیں گی۔