14 جون ، 2023 
یونان کے قریب سمندرمیں تارکین وطن کی کشتی ڈوب گئی، 79 افراد ہلاک، سیکڑوں لاپتہ
14 جون ، 2023
یونان کے قریب سمندر میں تارکین وطن کی کشتی ڈوب گئی جس کے نتیجے میں 79 افراد ہلاک اور سیکڑوں لاپتہ ہوگئے۔
غیرملکی خبرایجنسی کے مطابق یونان کے پیپلوپونیز ریجن میں سمندر میں تارکین وطن کی کشتی ڈوبنے کا واقعہ پیش آیا۔
حکام کا کہنا ہے کہ تارکین وطن کی کشتی لیبیا سےاٹلی کی طرف جارہی تھی کہ حادثے کا شکار ہوگئی جس کے نتیجے میں کم از کم 79 تارکین وطن ڈوب کر ہلاک ہوگئے جبکہ 104 مسافروں کو بچالیا گیا ہے۔
حکام نے بتایا کہ 65 سے 100 فٹ لمبی کشتی میں ممکنہ طورپر750 افراد سوار تھے، کشتی میں سوار افراد کی تعداد ابھی معلوم نہیں ہوسکی۔
یورپین ریسکیو سپورٹ چیریٹی نے کشتی میں 750 تارکین وطن جبکہ اقوام متحدہ کی ایجنسی نے 400 افراد کے کشتی پر سوار ہونے کا دعویٰ کیا ہے۔
یونانی حکام کا کہنا ہے کہ کشتی میں بیشترتارکین وطن کا تعلق مصر، شام، افغانستان اور پاکستان سے ہے۔
حکام کے مطابق یونانی کوسٹ گارڈز اور نیوی کشتیاں، جہاز اور ہیلی کاپٹرز ریسکیو آپریشن میں شریک ہیں تاہم تیز ہواؤں کے باعث سرچ آپریشن میں مشکلات کا سامنا ہے۔
