کھیل

آئی سی سی نے کرکٹ قوانین میں اہم تبدیلیاں کر دیں

13 جولائی ، 2023

کرکٹ قوانین میں تبدیلیاں ڈربن میں آئی سی سی کی سالانہ میٹنگز کے دوران کی گئیں۔ فوٹو فائل

انٹرنیشنل کرکٹ کونسل (آئی سی سی) نے مینز اور ویمنز ایونٹس کے لیے یکساں انعامی رقم کا اعلان کر دیا۔

انٹرنیشنل کرکٹ کونسل نے مختلف لیگز کے حوالے سے قانون سازی کرلی ہے ، اب لیگز کھلاڑیوں کے ہوم بورڈ کو کھلاڑی کی سائننگ کے عوض فیسں دینے کی پابند ہوں گی جبکہ پلیئنگ الیون میں کھلاڑیوں کی تعداد پر بھی شرائط عائد کردی گئی ہیں۔

ڈربن میں ہونیوالے آئی سی سی اجلاس کے بعد جاری بیان میں کہا گیا ہے کہ آئندہ ہونے والی انٹرنیشنل لیگز میں ٹیموں کی فائنل الیون میں زیادہ سے زیادہ چار اوور سیز کھلاڑی ہی کھیل سکیں گے تاہم ایسوسی ایٹ ملک کی نمائندگی کرنے والے کھلاریوں کو سات لوکلز کھلاڑیوں کی فہرست میں شامل کیا جاسکے گا۔

فوری طور پر موجودہ لیگز پر اس کا اطلاق نہیں ہوگا جس کی وجہ سے آئی ایل ٹی ٹوئنٹی اور میجر لیگ ٹی ٹوئنٹی لیگ کو استثنیٰ حاصل ہوگا مگر مستقبل میں انہیں اس پر عملدرآمد کرنا ہوگا۔

آئی سی سی اجلاس میں اس معاملے پر پاکستان نے لیگز کو کنٹرول کرنے کے حق میں ووٹ دیا تھا۔

اجلاس میں سلو اوور ریٹ قانون پر بھی ترامیم کی گئیں اور طے کیا گیا کہ پلیئرز پر فی اوور پانچ فیصد جرمانہ ہوگا اور زیادہ سے زیادہ 50 فیصد میچ فیس کا ہی جرمانہ ہو سکے گا۔

واضح رہے کہ حال ہی میں انڈیا کی ٹیم کے پلیئرز پر پوری 100 فیصد میچ فیس کا جرمانہ عائد کر دیا گیا تھا۔

انٹرنیشنل کرکٹ کونسل نے اجلاس میں مردوں اور خواتین کے آئی سی سی ایونٹس میں یکساں انعامی رقم دینے کی بھی منظور دیدی گئی جبکہ آئی سی سی کا نیا فنانشل ماڈل بھی منظور کر لیا گیا جس کے تحت انڈین کرکٹ بورڈ کو آئی سی سی آمدن کا بڑا حصہ ملے گا۔