14 جولائی ، 2023 
سینٹرل ایشین انڈر 16 والی بال چیمپئن شپ میں پاکستان کا شاندار آغاز
14 جولائی ، 2023
سینٹرل ایشین انڈر 16 والی بال چیمپئن شپ میں پاکستان کا شاندار آغاز ہوا ہے۔
پاکستان نے پہلے میچ میں ایران کو سنسنی خیز مقابلے کے بعد 2-3 سے شکست دیدی۔ ایران نے پہلا سیٹ 19-25 سے جیتا، پاکستان نے دوسرا سیٹ 27-29 سے جیت کر مقابلہ برابر کیا۔
تیسرے سیٹ میں ایران نے کامیابی حاصل کرکے پھر برتری حاصل کرلی۔ چوتھے اور پانچویں سیٹ میں پاکستان نے شاندار پرفارمنس دے کر تاریخی فتح سمیٹی۔
جمعے کو ازبکستان کے شہر تاشقند میں شروع ہونیوالی چیمپئن شپ میں پاکستان والی بال ٹیم نے ایران کے خلاف شاندار پرفارمنس کا مظاہرہ کیا۔
پاکستان کی کامیابی کا اسکور 25-19، 27-29، 25-19، 17-25 اور 13-15 رہا۔ پاکستان کی جانب سے میچ میں خضر حیات، طلال احمد، اجمل جنید، یحییٰ آفریدی اور مہد علی شاہ نے شاندار پرفارمنس کا مظاہرہ کیا۔
پاکستان والی بال فیڈریشن کے سیکرٹری جنرل شاہ نعیم ظفر کا کہنا ہے کہ پاکستان انڈر 16 ٹیم کی ایران کیخلاف فتح اس بات کا ثبوت ہے کہ پاکستان میں والی بال کا بے پناہ ٹیلنٹ موجود ہے، نوجوان کھلاڑیوں نے سخت چیلنج کا سامنا کرتے ہوئے پریشر صورتحال میں میچ جیتا جو مستقبل کیلئے کافی حوصلہ افزا ہے۔
