کاروبار

نیا قرض پروگرام: پاکستان اور آئی ایم ایف کی مزید اہم شرائط سامنے آگئیں

19 جولائی ، 2023

پاکستان نے آئی ایم ایف کو یقین دہانی کرائی ہے کہ ہاؤسنگ اور تعمیرات کے شعبے میں خامیاں دورکی جائیں گی__فوٹو: فائل

عالمی مالیاتی ادارے (آئی ایم ایف) کے ساتھ پاکستان کے نئے قرض پروگرام کے لیے طے پانے والی مزید اہم شرائط سامنے آگئیں۔

دستاویز کے مطابق منی لانڈرنگ اور ٹیررفنانسنگ کے خلاف فیٹف شرائط پرعملدر آمد کا عزم کیا گیا ہے، اس کے علاوہ کرپشن کی روک تھام کے لیے الیکٹرانک ایسیٹ ڈکلیئریشن سسٹم قائم کردیا گیا ہے۔

آئی ایم ایف دستاویز کے مطابق گریڈ17 سے 22 کے افسران بیرونی اثاثے نہیں چھپا سکیں گے، بینکوں سمیت قانون نافذ کرنے والے اداروں کو معلومات تک رسائی ہوگی، اس حوالے سے تمام بینکس ایف بی آرکو فیڈ بیک دینے کے پابند ہوں گے۔

یہ بھی پڑھیں

دستاویز میں بتایا گیا ہے کہ ان شرائط میں یہ بھی شامل ہے کہ منتخب یا غیرمنتخب عوامی نمائندوں کے سالانہ اثاثہ ڈکلیئریشن کو عام کیاجائےگا، سینٹرل مانیٹرنگ یونٹ سرکاری اداروں کی کارکردگی رپورٹ جاری کرےگا۔

غریب ترین طبقے کو مہنگائی کے حساب سے ریلیف دینے کا عزم بھی آئی ایم ایف کی دستاویز میں شامل ہے۔

آئی ایم ایف کے مطابق توانائی شعبے میں بنیادی ٹیرف میں اضافے کا اطلاق یکم جولائی سے ہوگیا۔

دوسری جانب پاکستان نے آئی ایم ایف کو یقین دہانی کرائی ہے کہ ہاؤسنگ، تعمیرات کے شعبے میں خامیاں دورکی جائیں گی، آئی ایم ایف کوایکسچینج ریٹ مارکیٹ میں مداخلت یا کوئی پابندی نہ لگانے کی یقین دہانی بھی کرائی گئی ہے۔