23 جولائی ، 2023 
ایم کیو ایم کے بعد جماعت اسلامی کا بھی نئی مردم شماری کے تحت حلقہ بندیوں کا مطالبہ
23 جولائی ، 2023
متحدہ قومی موومنٹ (ایم کیو ایم) پاکستان کے بعد جماعت اسلامی نے بھی نئی مردم شماری کی بنیاد پر حلقہ بندیاں کرنے کے بعد الیکشن کرانے کا مطالبہ کردیا ہے۔
کراچی میں پریس کانفرنس کے دوران امیر جماعت اسلامی کراچی حافظ نعیم الرحمان نے وفاقی وزیر داخلہ رانا ثنا کے بیان پر وزیر اعظم کو خط لکھنے کا اعلان کرتے ہوئے کہا کہ رانا ثنا اللہ نے جو بات کی وزیرِ اعظم اس کا نوٹس لیں، رانا ثنا اللہ کو کس نے یہ حق دیا ہے کہ وہ مردم شماری کے نتائج روکیں؟
انہوں نے کہا کہ مردم شماری میں کراچی کی صحیح گنتی نہیں ہوئی، اس مردم شماری سے کراچی والوں کا نقصان ہو رہا ہے۔
ان کا کہنا تھا کہ شفاف مردم شماری کے بعد حلقہ بندیاں کرائی جائیں اس کے بعد الیکشن ہو، جعلی مردم شماری پر اگر الیکشن ہوا تو یہ کراچی والوں کے ساتھ ناانصافی ہوگی۔
