04 اگست ، 2023 
مانسہرہ میں بچوں نے 95 سالہ باپ کی دوسری شادی کروا دی، دلہا خوشی سے نہال
04 اگست ، 2023
خیبر پختونخوا (کے پی) کے ضلع مانسہرہ میں 95 سالہ بزرگ محمد زکریا نے بچوں کی رضامندی سے دوسری شادی کر لی۔
اردو نیوز کی ایک رپورٹ کے مطابق محمد زکریا مانسہرہ کے علاقے پکھوال چوک کے رہائشی ہیں جن کی پہلی اہلیہ 2011 میں انتقال کر گئی تھیں، پہلی اہلیہ سے ان کے 7 بیٹے اور 5 بیٹیاں ہیں جن سے ان کے کئی پوتے پوتیاں اور نواسے نواسیاں بھی ہیں۔
رپورٹ کے مطابق محمد زکریا مانسہرہ کی کاروباری شخصیت ہیں جو فصلوں اور بیچوں کے کاروبار سے وابستہ ہیں تاہم وہ پہلی اہلیہ کے انتقال کے بعد سے خود کو کئی برسوں سے اکیلا محسوس کر رہے تھے لہٰذا انھوں نے کئی سال قبل اپنے بچوں سے دوسری شادی کی خواہش کا اظہار کیا تاہم اس وقت بچوں نے والد کی اس خواہش کو قبول کرنے سے انکار کر دیا تھا۔
محمد زکریا نے بتایا کہ کئی برسوں بعد اب ان کے چھوٹے بیٹے نے ان کے لیے دلہن تلاش کرتے ہوئے ان کی دوسری شادی کی خواہش پوری کروا دی ہے، محمد زکریا کی دوسری اہلیہ بھی بیوہ ہیں۔
رپورٹ کے مطابق عمر رسیدہ جوڑے کی شادی کی تقریب کے لیے مانسہرہ کے ہال کا انتخاب کیا گیا جہاں دلہا کو نکاح نامے پر دستخط کے وقت خوشی سے نہال دیکھا گیا۔
