بھارت میں ہونے والے کرکٹ ورلڈ کپ کی ٹرافی پاکستان کب لائی جائے گی؟

رواں برس بھارت میں ہونے والے کرکٹ ورلڈ کپ کی ٹرافی کا پاکستان ٹوور جولائی کے آخری اور اگست کے پہلے ہفتے میں طے تھا تاہم اسے ملتوی کردیا گیا۔

آئی سی سی کرکٹ ورلڈ کپ 5 اکتوبر سے بھارت میں کھیلا جائے گا، ایونٹ سے قبل روایتی ٹرافی ٹوور جون کے آخر میں شروع کردیا گیا تھا۔

ابتدائی شیڈول کے مطابق اس ٹرافی کو 31 جولائی سے 4 اگست کے دوران پاکستان کا دورہ کرنا تھا لیکن یہ دورہ ملتوی کردیا گیا تھا۔

اب پی سی بی اور آئی سی سی مل کر نئے شیڈول پر کام کررہے ہیں جس کے مطابق ورلڈ کپ ٹرافی ایشیا کپ میں پاکستان لیگ کے دوران یہاں لائی جائے گی۔

پاکستان میں ایشیا کپ کے میچز 31 اگست سے 6 ستمبر کے درمیان کھیلے جائیں گے۔

ورلڈ کپ ٹرافی کے پاکستان ٹوور کیلئے آئی سی سی اور پی سی بی انتظامات کو حتمی شکل دے رہے ہیں اور فائنل شیڈول جلد جاری کردیا جائے گا۔

واضح رہے کہ آئی سی سی ورلڈ کپ کی ٹرافی ان دنوں بنگلا دیش میں موجود ہے۔