کاروبار

آرمی چیف کی تاجروں کے وفد کو سرمایہ کاری کے فروغ کیلئے آسانیاں پیدا کرنے کی یقین دہانی

04 ستمبر ، 2023

ملاقات کے دوران تاجروں نے آرمی چیف سے درخواست کی کہ انٹر بینک اور اوپن مارکیٹ میں امریکی ڈالر کی قیمتوں پر کنٹرول کرنے پر زور دیا جائے۔: صدر لاہور چیمبر آف کامرس اینڈ انڈسٹریز— فوٹو: فائل

لاہور چیمبر آف کامرس اینڈ انڈسٹری کے وفد سے ملاقات میں آرمی چیف جنرل عاصم منیر نے اسپیشل انویسٹمنٹ فیسلی ٹیشن کونسل کے اہم کردار پر روشنی ڈالتے ہوئے تاجروں کو یقین دہانی کرائی ہے کہ سرمایہ کاری کے فروغ کیلئے آسانیاں پیدا کی جائیں گی۔

ملاقات کے بعد لاہور چیمبر آف کامرس کے صدر کاشف انور نے بتایا کہ آرمی چیف نے تاجروں کو یقین دہانی کروائی ہے کہ منی ایکسچینج کو ٹیکس کے دائرے میں لایا جائے گا، جبکہ ڈالر کے تبادلے کے معاملے میں انٹر بینک ریٹس میں شفافیت کو فروغ دیا جائے گا۔

لاہور چیمبر آف کامرس کے صدر نے بتایا کہ ملاقات کے دوران آرمی چیف نے سعودی عرب، متحدہ عرب امارات اور کویت سمیت دیگر ممالک سے 100 ارب ڈالر تک کی سرمایہ کاری کو راغب کرنے کی صلاحیت پر زور دیتے ہوئے اقتصادی فیصلہ سازی کو تقویت دینے کیلئے اقتصادی معاملات اور مختلف شعبوں پر توجہ کرنے والی ٹاسک فورسز کی تشکیل کا انکشاف کیا۔

کاشف انور کا کہنا تھا کہ ملاقات کے دوران تاجروں کے وفد نے آرمی چیف کو بجلی کے بلوں پر انکم اور سیلز ٹیکس کی شرح میں کمی کی تجویز پیش کرتے ہوئے فیول ایڈجسٹمنٹ چارجز کی وصولی کیلئے عملی نقطہ نظر بیان کیا کہ صارفین پر مالی دباؤ کم کرنے کیلئے ان کی وصولی سردیوں میں کی جائے۔

ملاقات کے دوران تاجروں نے آرمی چیف سے درخواست کی کہ انٹر بینک اور اوپن مارکیٹ میں امریکی ڈالر کی قیمتوں پر کنٹرول کرنے پر زور دیا جائے۔