12 ستمبر ، 2023 
کراچی میں بڑی تعداد میں ایس ایچ اوز کی تقرریاں اور تبادلے متوقع، 300 پولیس افسران کے انٹرویوز
12 ستمبر ، 2023
کراچی کے لگ بھگ 114 تھانوں کے ایس ایچ اوز کی تقرریاں اور تبادلے آئندہ ایک دو روز میں متوقع ہیں۔
اس سلسلے میں شہر کے تمام تھانے داروں سمیت لگ بھگ 300 سے زائد افسران کے ایڈیشنل آئی جی کراچی کی سربراہی میں کمیٹی نے انٹرویوز کیے ۔
ایڈیشنل آئی جی کراچی خادم حسین رند، تینوں زون کے ڈی آئی جیز عاصم خان قائم خانی، غلام اظفر مہیسر، اسد رضا اور تمام ایس ایس پیز نے کراچی پولیس آفس (کے پی او) میں انسپیکٹر اور سب انسپیکٹر کے عہدے کے پولیس افسران کے انٹرویوز کیے۔
پولیس ذرائع کے مطابق انٹرویوز میں تمام تھانوں کے ایس ایچ اوز کو اس لیے بلایا گیا تھا کہ ان کی تھانے میں تعیناتی کے دورانیہ اور کارکردگی کی جانچ پڑتال کی جائے۔
ذرائع کا کہنا ہے کہ طویل دورانیے تک کسی تھانے میں تعینات پولیس افسروں کو ہٹایا جا رہا ہے یا انہیں کسی دوسرے تھانے میں تعینات کیا جائے گا۔
ذرائع کے مطابق سابقہ دور میں اب تک ایس ایچ او کے عہدے پر تعیناتی سے محروم پولیس افسران کو بھی آئندہ کام کرنے کا موقع دیا جائے گا۔گزشتہ سالوں کے سیاسی دورانیے میں تعینات رہنے والے بیشتر ایس ایچ اوز کو عہدوں سے ہٹایا جا رہا ہے جبکہ کرپشن اور دیگر الزامات کا سامنا کرنے والے کئی ایس ایچ اوز کے خلاف تحقیقات بھی کی جائیں گی۔
ذرائع کا کہنا ہے کہ اس سلسلے میں لگ بھگ 80 ایس ایچ اوز کی فہرستیں تیار کی گئی ہیں اور بعض تلخ فیصلے بھی کیے جا رہے ہیں۔
