سکھر: کچے میں ڈاکوؤں کے خلاف آپریشن جاری، چار مشکوک افراد زیر حراست
18 ستمبر ، 2023
پولیس کے ترجمان نے دعویٰ کیا ہے کہ سکھر کے کچے کے علاقوں شاہ بیلو اور الف کچا میں ڈاکوؤں کیخلاف جاری پولیس آپریشن کے دوران چار مشکوک افراد کو حراست میں لیا گیا ہے۔
ترجمان پولیس کے مطابق آپریشن شہید صحافی جان محمد مہر کے قاتلوں کی گرفتاری کیلئے کیا جا رہا ہے، جلد ملزمان کو گرفتار کر لیا جائے گا۔
ایس ایس پی سکھرعرفان علی سموں کے مطابق آپریشن میں حساس اداروں سے بھی معلومات حاصل کی جا رہی ہیں جبکہ پولیس کے ساتھ رینجرز اہلکار بھی آپریشن میں شریک ہیں۔
خیال رہے کہ ڈی آئی جی آفس لاڑکانہ میں آپریشن سے متعلق اعلیٰ سطحی اجلاس میں فیصلہ کیا گیا تھا کہ ڈاکوؤں کے خلاف آپریشن کیلئے ضلعی سطح پر ایک ٹاسک فورس تشکیل دی جائے گی جس میں قانون نافذ کرنے والے اداروں کے ساتھ ساتھ انٹیلی جنس ایجنسیاں بھی شامل ہوں گی۔
اجلاس میں فیصلہ کیا گیا کہ کچے کے ڈاکوؤں کے خلاف آپریشن کی پلاننگ ٹاسک فورس سے مل کر کی جائے گی۔
