28 ستمبر ، 2023 
گاڑیوں کی امپورٹ کی آڑ میں حوالہ ہنڈی اور منی لانڈرنگ کی تحقیقات، قیمتی گاڑیاں سیز
28 ستمبر ، 2023
گاڑیوں کی امپورٹ کی آڑ میں حوالہ ہنڈی کی تحقیقات میں ایف آئی اے نے کراچی کے علاقے کلفٹن میں 4 شو رومز کو نوٹس جاری کردیا۔
ایف آئی اے ذرائع کے مطابق کمرشل بینکس سرکل کے عملے نےکلفٹن میں کارروائی کے دوران 2 قیمتی گاڑیاں سیز کر دیں۔
حکام کے مطابق کلفٹن میں قیمتی امپورٹڈ گاڑیوں کا کاروبار کرنے والے 4 شو رومز کو نوٹس جاری کیا گیا ہے اور انہیں تین اکتوبر کو ایف آئی اے کمرشل بینکس سرکل طلب کیا گیا ہے۔
نوٹسز میں شوروم مالکان کو گاڑیوں کی درآمد اور فروخت کے حوالے سے تمام ریکارڈ پیش کرنے کی ہدایت کی گئی ہے۔
شوروم مالکان کو نوٹسز کے ساتھ پرفارمہ بھی فراہم کیا گیا ہے، جس میں مختلف تفصیلات طلب کی گئی ہیں، شوروم مالکان کو گاڑی کا ماڈل، رجسٹریشن، رنگ، میکر اور چیسز فراہم کرنےکی بھی ہدایت کی گئی ہے۔
اس سے قبل ایف آئی اے کا کمرشل بینکس سرکل خالد بن ولید روڈ پر بھی متعدد کاروائیاں کر چکا ہے۔
