امید ہے جیت کا مومینٹم برقرار رکھ کر حیدرآباد کا مرحلہ بھی جیت پر ختم کرینگے: محمد نواز

 آل راؤنڈر محمد نواز کا کہنا تھا کہ  کوشش ہوگی کہ سری لنکا کے خلاف  مقابلے کے دوران بھی   جیت کے مومینٹم کو برقرار رکھیں اور حیدرآباد کا مرحلہ جیت پر ختم کریں۔

 آل راؤنڈر محمد نواز نے پی سی بی ڈیجیٹل سے بات کرتے ہوئے کہا کہ یہ بہت ضروری ہوتا ہے کہ آپ کسی بھی بڑے ٹورنامنٹ کا آغاز مثبت انداز میں کریں اور ہم یہی کچھ دیکھ رہے تھے۔ ہم نے یہاں 2  پریکٹس میچز کھیلے اور پھر پہلا میچ بھی یہیں کھیلا ہے اور اب ہم امید کررہے ہیں کہ اسی مومینٹم کو برقرار رکھیں اور حیدرآباد کا مرحلہ جیت پر ختم کریں۔

سعود شکیل اور محمد رضوان کی پارٹنرشپ اس صورتحال میں بہت اہم رہی :محمد نواز 

محمد نواز کہتے ہیں کہ سعود شکیل اور محمد رضوان کی پارٹنرشپ اس صورتحال میں بہت اہم رہی جب38 رنز پر تین وکٹیں گرچکی تھیں۔

محمد نواز  کے مطابق  وہ اور شاداب خان یہ پلان بناچکے تھے کہ پارٹنرشپ قائم کرنی ہے اننگز کو آگے لے جانا ہے اور پھر اٹیک کرنا ہے لیکن بدقسمتی سے ایسا نہ ہوسکا تاہم ہم ایک اچھا ٹوٹل ٹیم کو دینے میں کامیاب رہے۔

باس ڈی لیڈے کی وکٹ سے متعلق  محمد نواز کا کہنا ہے کہ باس ڈی لیڈے اچھے آل راؤنڈر ہیں اور وہ اس وقت اچھا کھیل رہے تھے ان کی وکٹ بہت اہم تھی، ساتھ ہی کسی بھی لیفٹ آرم اسپنر کے لیے وہ ایک ڈریم بال ہوتی ہے جو اندر آئے اور پھر باہر ٹرن ہوجائے۔

محمد نواز کے خیال میں بھارتی  کنڈیشنز میں ہم تمام بولرز کو ڈسپلن کے ساتھ بولنگ کرنی ہوگی، اسپنرز کا کردار اہم ہوگا، زیادہ تر وینیوز بیٹنگ کے لیے سازگار ہیں لیکن جیسے جیسے ٹورنامنٹ آگے بڑھے گا پچز پر زیادہ ٹرن ملے گم باؤنڈریزنسبتاً چھوٹی ہیں لہذا بولرز کے لیے آسان نہیں ہوگا لیکن ہم نے ان کنڈیشنز سے ہم آہنگ ہونے کی کوشش کی ہے،  پچھلے میچ سے جو اعتماد حاصل کیا ہے اسے آئندہ میچوں میں بھی ٹیم کی ضروریات کے مطابق بروئے کار لانا چاہوں گا۔

واضح رہے کہ آئی سی سی ورلڈ کپ میں پاکستان ٹیم اپنا دوسرا میچ کل سری لنکا کے خلاف کھیلے گا۔

پاکستان اور سری لنکا کے درمیان اب تک ورلڈ کپ کے 7میچز کھیلے گئے جس میں تمام میں پاکستان ٹیم نے کامیابی حاصل کی۔