میچ جیت کر خوش ہیں، کوشش ہے سیمی فائنل میں پہنچیں: شاہین آفریدی

پاکستان کرکٹ ٹیم کے فاسٹ بولر شاہین آفریدی کا کہنا ہے کہ آج گیم اچھا ہوا، سب خوش ہیں کہ میچ جیتے ہیں، ہماری اب بھی یہی کوشش ہے کہ ٹاپ فور میں ختم کریں۔

بنگلادیش کے خلاف کامیابی کے بعد میڈیا سے گفتگو کرتے ہوئے شاہین آفریدی نے کہا کہ آج ہماری کوشش یہی تھی کہ میچ جلدی فنش کر کے رن ریٹ بہتر کریں، پلیئرزکی کوشش یہی ہے کہ سیمی فائنل میں جگہ بنائیں۔

شاہین آفریدی نے کہا کہ آئی پی ایل کے میچز دیکھے تھے جس سے اندازہ تھا کہ شروع میں سوئنگ نہیں ہونا، صرف میرے ساتھ نہیں دیگر لیفٹ آرم فاسٹ بولرز کو بھی یہ ہی مسئلہ ہوا، یہاں لینتھ پر بولنگ کرنا اہم ہے،کوشش ہوتی ہے کہ یہاں مختلف ورائٹی کے ساتھ بولنگ کریں۔

فاسٹ بولر کا کہنا تھا کہ جب جیت ہوتی ہے تو سب کچھ اچھا نظر آتا ہے، ہم پچھلے میچز بطور ٹیم اچھا نہیں کھیلے، کہیں کہیں غطیاں کیں جو مہنگی پڑیں، کچھ کیچز ڈراپ نہیں ہوتے ، فیلڈنگ بہتر ہوتی تو نتائج بہتر ہوسکتے تھے،ہم اب بھی ٹورنامنٹ میں ہیں اور اچھا کرنے کی کوشش کریں گے۔

شاہین نے بتایا کہ شاہد آفریدی ہمیشہ ٹپس دیتے ہیں، وہ میرے ہیرو ہیں، ہمیشہ اچھی رہنمائی ملتی ہے، میری کوشش ہے کہ ان کی طرح ہی دلیری سے کرکٹ کھیلوں۔

بنگلادیش کے خلاف دیگر بولز کی بات کرتے ہوئے کہا کہ محمد وسیم نے کافی اچھی بولنگ کی،حارث رؤف کا وائٹ بال ٹیم میں کافی اہم کردار ہے، حارث محنت کر رہا ہے، وکٹیں بھی ملی ہیں، کوشش ہوگی کہ وہ اور بہتر کرے۔

واضح رہے کہ آئی سی سی ون ڈے ورلڈکپ کے 31ویں میچ میں پاکستان نے بنگلادیش کو با آسانی 7 وکٹوں سے شکست دے دی۔

پہلے بیٹنگ کرتے ہوئے بنگلادیش کی پوری ٹیم 46 ویں اوور میں 204 رنز بناکر آؤٹ ہوگئی ۔محمود اللہ 56 رنز بناکر نمایاں رہے۔

پاکستان کی جانب سے شاہین شاہ آفریدی اور محمد وسیم نے 3،3 وکٹیں حاصل کیں جبکہ حارث رؤف نے 2، افتخار احمد اور اسامہ میر نے ایک ایک وکٹ لی۔

شاہین آفریدی ون ڈے میں تیز ترین 100 وکٹیں لینے والے پاکستانی بولر بن گئے

شاہین آفریدی 100 وکٹیں لینے والے تیز ترین پاکستانی بھی بن گئے ہیں، انہوں نے یہ اعزاز ورلڈکپ میں بنگلادیش کے خلاف میچ میں حاصل کیا جس میں انہوں نے اپنے پہلے ہی اوور میں بنگلادیشی اوپنر تنزید حسن کو صفر پر آؤٹ کردیا۔

پاکستانی بولر نے 51 میچز میں 100 ون ڈے وکٹیں مکمل کیں جب کہ مچل اسٹارک نے 52 میچز میں 100 وکٹیں مکمل کی تھیں۔

پاکستان نے بنگلادیش کا 205 رنز کا ہدف با آسانی 33 ویں اوور میں 3 وکٹوں کے نقصان پر پورا کرلیا، فخر زمان نے شاندار 81 رنز بنائے، ان کی اننگز میں 7 چھکے شامل تھے۔