موجودہ قومی ٹیم میں اتحاد سمیت سب کچھ ہے جو اچھی چیز ہے: اشنا شاہ

پاکستانی اداکارہ اشنا شاہ کا کہنا ہے کہ  پاکستان کی موجودہ کرکٹ ٹیم  میں مذہب کا عنصر خاصا نمایاں ہے جب کہ احسن خان کی رائے کے مطابق  موجودہ ٹیم ایک بہت اچھی ٹیم ہے۔

نجی میڈیا چینل پر ایک شو  کے دوران سابق فاسٹ بولر اور میزبان شعیب اختر نے  اداکارہ اشنا شاہ اور اداکار احسن خان سے  مختلف موضوعات پر دلچسپ سوال کیے اور اسی دوران شعیب اختر نے  یہ بھی پوچھا کہ پاکستان ٹیم کو دیکھ کر پہلا تاثر  آپ کے ذہن میں کیا آتا ہے؟ 

سوال کے جواب میں اشنا شاہ نے کہا کہ ’ سچ تو یہ ہے کہ میں نے کبھی ٹیم کو اس گہری نگاہ سے  نہیں دیکھا، میری پرورش کینیڈا میں ہوئی، میں نے لیجنڈز کرکٹرز کو کھیلتے ہوئے نہیں دیکھا اس لیے میں اس ٹیم کا موازنہ پچھلی ٹیموں سے نہیں کرسکتی لیکن اتنا کہوں گی کہ موجودہ ٹیم نے ایک نظریےکے تحت  اچھا مقام حاصل کیا ہے،ٹیم  اچھا پرفارم کررہی ہے۔

موجودہ ٹیم نے خود کو ایک زاویے پر رکھ کر پیش کیا ہےاور وہ زاویہ مذہب کا ہے : اشنا شاہ

 اداکارہ کے مطابق موجودہ ٹیم نے خود کو ایک زاویے  پر رکھ کر  پیش کیا ہےاور وہ زاویہ مذہب کا ہےجو کہ ایک اچھی چیز ہے۔

اشنا شاہ کے مطابق موجودہ ٹیم نے جو اپنی امیج ظاہر کی  اس میں بھائی چارہ، اللہ کی برتری،  اتحاد سب کچھ ہے جو کہ میرے لحاظ اچھی چیز ہے۔

دوسری جانب اداکاراحسن خان نے اپنی رائے کا اظہار کرتے ہوئے کہا کہ مجھے لگتا ہے کہ پاکستان کی موجودہ ٹیم بہت اچھی ہے، کرکٹ کی فیلڈ میں کوئی بھی کھلاڑی میدان میں تب اترسکتا ہے جب اس کے ماضی میں ٹریننگ شامل ہو جب کہ اگر شوبز کی بات کی جائے ہماری فیلڈ میں لوگ آکر ٹریننگ حاصل کرتے ہیں لیکن کرکٹ میں ایسا نہیں ہوتا۔

پاکستان کے سیمی فائنل میں پہنچنے سے متعلق سوال پر احسن خان نے کہا کہ ورلڈکپ کے سیمی فائنل تک پہنچنے کیلئے پاکستان ٹیم کے چانسز پورے ہیں، بابر اعظم  میرے بہترین بیٹسمین ہیں۔