14 نومبر ، 2023 
'بابر جیسی سپورٹ اگر مصباح، یونس اور آفریدی کو ملتی تو وہ بھی کوئی ورلڈکپ جیت جاتے'
14 نومبر ، 2023
پاکستان کے سابق وکٹ کیپر بیٹر کامران اکمل کا کہنا ہے کہ کپتان بابر اعظم اور ان کی ٹیم کو پاکستانی شائقین کی جانب سے بے حد سپورٹ ملتی ہے۔
کراچی میں ایک تقریب میں پاکستان کے لیجنڈ سابق کرکٹرز نے شرکت کی جن میں شاہد آفریدی، کامران اکمل، مصباح الحق، عمر گل، سعید اجمل، راشد لطیف اور شعیب ملک شامل تھے۔
تقریب سے خطاب کرتے ہوئے کامران اکمل نے کہا 'بابر اعظم اور ان کی ٹیم کو تین سال جتنا سپورٹ آپ لوگوں کی طرف سے پاکستان کی عوام کی طرف سے انہیں ملا اگر یہ ہی سپورٹ یونس بھائی، شاہد بھائی اور مصباح کو ملا ہوتا تو یہ بھی کوئی ورلڈکپ یا بڑا ایونٹ اپنے نام کرتے'۔
کامران اکمل نے کہا 'پاکستان ٹیم جیتنے کے ارادے سے کھیلی ہی نہیں جس کی وجہ سے اس ورلڈکپ میں نقصان اٹھانا پڑا، آپ ٹی ٹوئنٹی کی سلیکشن ختم کریں، ٹیم کا انتخاب ون ڈے کے طور پر کریں گے تو ہمیں ایسے بڑے ایونٹ میں مار نہیں کھانی پڑے گی'۔
انہوں نے یہ بھی کہا کہ 'بابر کو کپتانی کے چار سال ملے ہیں، میں بھائی کے طور پر بات کررہا ہوں ، سب جانتے ہیں میرا اس سے کیا رشتہ ہے، اگر سب چاہتے ہیں کہ بابر 24،25 ہزار رنز کرے تو اسے دباؤ ہٹانے کے لیے کپتانی ایک طرف کرنی پڑے گی ، جب ایسا ہوگا تو وہ بطور کھلاڑی اور اچھا پرفارم کرے گا'۔
سابق وکٹ کیپر بیٹر نے مسکراتے ہوئے آل راؤنڈر افتخار احمد کو کپتانی کے لیے بہترین آپشن قرار دیا۔
مزید خبریں :
نعمان علی آئی سی سی پلیئر آف دی منتھ کیلئے نامزد
6 گھنٹے پہلے
