’فیض آباد دھرنا کمیشن جنرل فیض کو بلائے گا تو پیش ہونگے لیکن ملک کو کیا فائدہ ہوگا؟‘

نگران وفاقی وزیر داخلہ سرفراز بگٹی نے کہا ہے کہ فیض آباد دھرنا کمیشن جنرل فیض کو جب بلائے گا تو وہ خود پیش ہو جائیں گے لیکن انہیں بلانا پاکستان کیلئے کتنا فائدہ مند ہوگا؟ اس پر سوالیہ نشان موجود ہے۔

ان کا کہنا تھا کہ میری رائے ہے کہ ماضی کی چیزوں کو نہیں چھیڑنا چاہیے۔

اپنے ایک ٹی وی انٹرویو بات چیت کرتے ہوئے نگران وزیر داخلہ نے کہا چیئرمین پی ٹی آئی کا معاملہ عدالتوں میں ہے، اس پر بات کرنا مناسب نہیں مگر تاریخ میں ایسا کبھی نہیں ہوا کہ ملزم کو گرفتار کر کے ریسٹ ہاؤس میں ٹھہرایا گیا ہو۔

انہوں نے بات جاری رکھتے ہوئے کہا کہ ایسا بھی کبھی نہیں ہوا کہ ایک ملزم کو دیکھ کر عدالت میں کہا جائے کہ آپ کو دیکھ کر اچھا لگا ’گڈ ٹو سی یو‘۔

پیپلز پارٹی کے لیول پلیئنگ فیلڈ دینے کے مطالبے کی طرف اشارہ کرتے ہوئے نگران وزیر داخلہ نے کہا کہ بلوچستان میں کافی وقت کے بعد پیپلز پارٹی نے اتنا بڑا جلسہ کیا ہے۔

ان کا کہنا تھا کہ پیپلز پارٹی کو لیول پلیئنگ فیلڈ ملی تھی، اسی لیے اس نے کوئٹہ میں اتنا بڑا جلسہ کیا۔