دلچسپ و عجیب

3 ماہ تک دریا میں غرق شدہ آئی فون ملنے کے بعد پھر کام کرنے لگا

19 دسمبر ، 2023

یہ وہ آئی فون 12 نہیں ہے / فوٹو بشکریہ ایپل انسائیڈر

اگر ایک اسمارٹ فون دریا میں گر جائے تو پہلے تو اس کو ڈھونڈنا ہی آسان نہیں ہوتا اور اگر وہ کچھ گھنٹوں بعد مل بھی جائے تو بھی اس کے کام کرنے کا امکان نہیں ہوتا۔

تو اگر ایک فون دریا کی تہہ میں 3 ماہ تک رہے تو کوئی بھی یہ توقع نہیں کرسکتا کہ وہ دوبارہ کام کرے گا۔

مگر امریکا میں3 ماہ سے دریا میں ڈوبا ہوا فون باہر نکلنے پر کام کرنے لگا۔

جی ہاں واقعی شمالی کیلیفورنیا کے ایک شخص کے ساتھ یہ واقعہ پیش آیا جسے دریا سے آئی فون 12 ملا۔

یہ آئی پی 68 سرٹیفائیڈ واٹر اور ڈسٹ ریزیزٹنس آئی فون ہے، مگر اس طرح کے فونز پانی کی 6 میٹر گہرائی میں صرف 30 منٹ تک رہ سکتے ہیں، جس کے بعد وہ خراب ہو جاتے ہیں۔

مگر ایپل کی یہ ڈیوائس بہت زیادہ سخت جان ثابت ہوئی۔

ایپل انسائیڈر کی ایک رپورٹ کے مطابق 10 نومبر کو دریائے Stanislaus کی صفائی کے دوران لی (Lee) نامی شخص نے کچھ چٹانوں کے درمیان کائی میں ڈھکا آئی فون دریافت کیا۔

اس شخص نے آئی فون کو صاف کیا اور پھر چند دن تک اس کے خشک ہونے کا انتظار کیا۔

16 نومبر کو اس نے آئی فون کو چارج کیا تو وہ کام کرنے لگا۔

اس ڈیوائس پر کوئی پاس کوڈ (pass code) نہیں تھا تو اس کے ڈیٹا کی جانچ پڑتال کرتے ہوئے معلوم ہوا کہ اس سے آخری ویڈیو 4 ستمبر کو اسی دریا کی بنائی گئی تھی۔

اس سے عندیہ ملتا ہے کہ یہ فون 3 ماہ سے دریا کی تہہ میں موجود تھا۔

ابھی تک یہ تو معلوم نہیں ہوسکا کہ یہ آئی فون کس کا تھا مگر لی کی جانب سے ڈیوائس میں موجود کانٹیکٹس کے ذریعے مالک تک پہنچنے کی منصوبہ بندی کی گئی ہے۔

ابھی یہ واضح نہیں کہ آخر 3 ماہ تک دریا میں رہنے کے باوجود یہ آئی فون محفوظ کیسے رہا۔