04 جنوری ، 2024 
پاکستان کے سابق بیٹنگ کوچ کی افغان ٹیم میں تقرری، پی سی بی نے حیرت کا اظہار کردیا
04 جنوری ، 2024
پاکستان کرکٹ ٹیم کے سابق بیٹنگ کوچ اینڈریو پیوٹک کو افغانستان کرکٹ بورڈ کی جانب سے ٹیم کا بیٹنگ کوچ مقرر کرنے پر پاکستان کرکٹ بورڈ (پی سی بی) نے حیرت کا اظہار کردیا۔
پاکستان کرکٹ بورڈ (پی سی بی) نے اس پیشرفت پر حیرت کا اظہار کرتے ہوئے کہا ہے کہ پیوٹک نے پی سی بی کو اب تک اپنا استعفیٰ نہیں دیا ہے۔
پی سی بی کے ترجمان کے جنوبی افریقا سے تعلق رکھنے والے اینڈریو پیوٹک کو پاکستان کرکٹ بورڈ نے مئی 2023 میں 2 سال کیلئے پاکستان ٹیم کا بیٹنگ کوچ مقرر کیا تھا تاہم ورلڈ کپ کے بعد پی سی بی کی نئی منیجمنٹ کمیٹی نے انہیں این سی اے میں رپورٹ کرنے کو کہا تھا جس کے بعد سے وہ چھٹیوں پر تھے۔
ترجمان کے مطابق بدھ کو خبر آئی کہ افغانستان کرکٹ بورڈ نے اینڈریو پیوٹک کو بیٹنگ کوچ مقرر کردیا ہے تاہم پاکستان کرکٹ بورڈ نے کہا کہ پیوٹک نے اپنے فیصلے سے پی سی بی کو آگاہ نہیں کیا، اسے یہ اطلاع میڈیا سے ہی ملی ہے۔
پی سی بی ترجمان نے اس بات کی تصدیق کی ہے کہ اینڈریو پیوٹک نے پاکستان کرکٹ بورڈ کو استعفیٰ نہیں بھجوایا۔
ذرائع کا کہنا ہے کہ پی سی بی کی نئی منیجمنٹ کمیٹی نے غیر ملکی کوچز کو یہ عندیہ دیا تھا کہ وہ ان کے پلانز میں شامل نہیں لیکن اختیارات محدود ہونے کی وجہ سے ان کا کنٹریکٹ ختم نہیں کیا جاسکا تھا۔
