10 جنوری ، 2024 
افغان طالبان کے امیر ملا ہیبت اللہ اخوندزادہ سے فضل الرحمان کی ملاقات
10 جنوری ، 2024
افغان طالبان کے سپریم لیڈر ملا ہیبت اللہ اخوندزادہ سے جمعیت علمائے اسلام کے سربراہ مولانا فضل الرحمان کی ملاقات ہوئی ہے۔
مولانا فضل الرحمان افغان حکومت کی دعوت پر وفد کے ہمراہ افغانستان کے دورے پر موجود ہیں جہاں ان کی افغان وزیراعظم، نائب وزیراعظم اور وزیر خارجہ سمیت دیگر حکام سے ملاقاتیں کیں۔
آج مولانا فضل الرحمان نے افغان طالبان کے سپریم لیڈر ملا ہیبت اللہ اخوندزادہ سے ملاقات کی ہے اور یہ ملاقات کچھ دیرقبل ہوئی ہے۔
افغان حکام نے طالبان امیر اور فضل الرحمان کی ملاقات کی جیو نیوز کو تصدیق کی ہے تاہم افغانستان میں ملاقات کے مقام اور شرکاء سے متعلق نہیں بتایا۔
ملاقات کے حوالے سے مزید کوئی تفصیلات سامنے نہیں آسکی ہیں۔
دوسری جانب طلوع نیوز نے اپنے ذرائع سے تصدیق کی ہے کہ افغان سپریم لیڈر اور فضل الرحمان کے درمیان ون آن ون ملاقات ہوئی اور یہ ملاقات آج صبح قندھار میں ہوئی ہے۔
