2024 کے لیے دنیا کے 10 بہترین شہر

کیا چیز کسی شہر کو بہترین بناتی ہے؟ کچھ افراد کے خیال میں مصروف علاقے، سستے کھانے اور دیگر سہولیات اہم ہوتی ہیں۔

دیگر کا ماننا ہے کہ سرسبز مقامات تک رسائی، مقامی افراد کی خوشی اور سماجی ہم آہنگی جیسے عناصر کسی شہر کو بہترین بناتے ہیں۔

ٹائم آوٹ کے سالانہ سروے میں 2024 کے لیے 50 بہترین شہروں کا انتخاب کیا گیا ہے جس کے لیے ماہرین کے ساتھ ساتھ وہاں کے مقامی رہائشیوں کی رائے کو مدنظر رکھا گیا۔

اس سروے میں ہزاروں افراد کو شامل کیا گیا تھا اور شہروں کے معیار زندگی، خوراک کی قیمتوں، ثقافت اور دیگر پہلوؤں کو مدنظر رکھ کر درجہ بندی کی گئی۔

فہرست میں شامل ٹاپ 10 شہر درج ذیل ہیں۔

10۔ پورٹو، پرتگال

یورپی ملک پرتگال کے اس شہر کو فہرست میں 10 ویں نمبر پر رکھا گیا ہے۔

9۔ روم، اٹلی

اٹلی کا دارالحکومت روم اپنے تاریخی آثار کی بنا پر دنیا بھر کے سیاحوں کا پسندیدہ مقام ہے۔

مگر اس کے ساتھ ساتھ یہاں کے پکوان، اوپن ائیر مارکیٹیں اور دیگر جگہیں بھی لوگوں کی توجہ کا مرکز ہیں۔

8۔ ٹوکیو، جاپان

آبادی کے لحاظ سے دنیا کا سب سے بڑا شہر ٹوکیو اس فہرست میں 8 ویں نمبر پر موجود ہے۔

7۔ لیور پول، برطانیہ

برطانیہ کا یہ شہر فٹبال میچز کے لیے جانا جاتا ہے مگر اس کے ساتھ ساتھ کہا جاتا ہے کہ یہ وہ شہر ہے جو کبھی نہیں سوتا۔

6۔ میکسیکو سٹی، میکسیکو

میکسیکو کا یہ شہر اس ملک کا ثقافتی مرکز بھی ہے جبکہ یہاں کے پکوان، موسم اور سستے طرز زندگی نے اسے فہرست میں چھٹے نمبر پر پہنچایا۔

5۔ میڈرڈ، اسپین

اسپین کا یہ شہر اس فہرست میں 5 ویں نمبر پر ہے۔

4۔ لندن، برطانیہ

برطانیہ کا دارالحکومت لندن کسی تعارف کا محتاج نہیں، یہ ان چند شہروں میں سے ایک ہے جہاں ہر سال سب سے زیادہ سیاح رخ کرتے ہیں۔

لندن دنیا کے ممتاز تجارتی، معاشی اور ثقافتی مراکز میں سے ایک ہے۔

3۔ برلن، جرمنی

جرمنی کے اس شہر کے حصے میں 2024 کے تیسرے بہترین شہر کا اعزاز آیا ہے۔

2۔ کیپ ٹاؤن، جنوبی افریقا

سروے میں ہر فرد نے اس شہر کو خوبصورت قرار دیا جو ساحلی علاقوں، شہری زندگی اور خوبصورت پہاڑی مناظر کا امتزاج ہے۔

مگر اس کے ساتھ ساتھ وہاں کی ثقافتی زندگی نے اسے 2024 میں دنیا کا دوسرا بہترین شہر بنایا۔

1۔ نیویارک، امریکا

نیویارک کے بارے میں کہا جاتا ہے کہ یہ وہ شہر ہے جو کبھی سوتا نہیں۔

یہ وہ شہر ہے جہاں دنیا کے ہر حصے کے باسی رہائش پذیر ہیں اس لیے سیاحوں کو غیرملک میں زیادہ اجنبیت بھی محسوس نہیں ہوتی۔