کاروبار

آئی ایم ایف سے دوسرے جائزے کیلئے مذاکرات انتخابات کے بعد متوقع

24 جنوری ، 2024

آئی ایم ایف نے دوسرے جائزے کیلئے درست شیڈول کی تصدیق نہیں کی لہٰذا جائزہ مذاکرات آئندہ عام انتخابات کے بعد ہونے کا امکان ہے: ذرائع/ فائل فوٹو

اسلام آباد: تین ارب ڈالر کے اسٹینڈ بائی ارینجمنٹ (ایس بی اے) پروگرام کے تحت مذاکرات کیلئے آئی ایم ایف اپنا جائزہ مشن 8 فروری کے عام انتخابات کے بعد پاکستان بھیجے گا۔

ذرائع کا خیال ہے کہ عام انتخابات کے بعد نئی حکومت کی تشکیل فروری 2024 کے آخر تک مکمل ہونے کی امید ہے، اسی لیے آئی ایم ایف کا جائزہ مشن نئی حکومت کی تشکیل سے قبل اسلام آباد کا دورہ کرکے دوسرا جائزہ مکمل کر سکتا ہے۔

سینئر سرکاری ذرائع نے دی نیوز سے بات چیت کرتے ہوئے اس بات کی تصدیق کی ہے کہ آئی ایم ایف نے دوسرے جائزے کیلئے درست شیڈول کی تصدیق نہیں کی لہٰذا جائزہ مذاکرات آئندہ عام انتخابات کے بعد ہونے کا امکان ہے۔

آئی ایم ایف نے اپنی تازہ ترین اسٹاف رپورٹ میں یہ اشارہ بھی دیا ہے کہ جولائی 2023 میں اسٹینڈ بائی ارینجمنٹ کے معاہدے پر دستخط کے وقت دوسرے جائزے کی تاریخ پر نظرثانی کی گئی تھی، دسمبر 2023 کے اختتام کیلئے دوسرا جائزہ یکم مارچ 2024 کیلئے تجویز کیا گیا تھا۔

اب پاکستان نے نظرثانی کیلئے 15 مارچ 2024ء کا شیڈول تجویز کیا ہےجس سے ظاہر ہوتا ہے کہ نظرثانی کی تکمیل کی تاریخ میں اس امکان کے ساتھ تبدیلی کی گئی تھی کہ دوسرے جائزے کیلئے عام انتخابات کے بعد بات چیت ہو سکتی ہے، موجودہ اسٹینڈ بائی پروگرام 12 اپریل کو ختم ہوگا۔

اگر دوسرا جائزہ مارچ تک مکمل ہو گیا تو آئی ایم ایف کے ایگزیکٹو بورڈ کے پاس کافی وقت ہوگا کہ وہ اپریل تک پاکستان کیلئے 1.1؍ ارب ڈالرز کی آخری قسط جاری کرے۔