04 فروری ، 2024 
عدت میں نکاح کا کیس: یہ قرآن کا نہیں ابلیس کا فیصلہ ہے، بشریٰ بی بی کا ردعمل
04 فروری ، 2024
سابق وزیراعظم اور بانی پی ٹی آئی عمران خان کی اہلیہ بشریٰ بی بی نے عدت میں نکاح سے متعلق کیس میں اپنے ردعمل کا اظہار کیا ہے۔
گزشتہ روز سینئر سول جج قدرت اللہ نے عدت میں نکاح سے متعلق کیس میں عمران خان اور بشریٰ بی بی کو 7، 7 قید کی سزا سنائی تھی۔
عدت میں نکاح کا کیس بشریٰ بی بی کے سابق شوہر خاور مانیکا کی جانب سے دائر کیا گیا تھا، اس کیس میں خاور مانیکا کے علاوہ عمران خان اور بشریٰ بی بی کا نکاح پڑھانے والے مفتی سعید، نکاح کے گواہ عون چوہدری اور خاور مانیکا کے ملازم محمد لطیف پر وکیل صفائی سلمان اکرم راجا نے جرح کی۔
بشریٰ بی بی نے عدالتی فیصلے پر ردعمل دیتے ہوئے کہا کہ یہ قرآن کا نہیں ابلیس کا فیصلہ ہے۔
میڈیا سے گفتگو میں کہا بشری بی بی کا کہنا تھا یہ غیرت اور بے غیرتی کی جنگ ہے، باہر سے غلام آگیا ہے، وہ نوکری کرے گا اب ان کی۔
دوسری جانب پاکستان تحریک انصاف کے رہنما بیرسٹر گوہر خان نے کہا کہ فیصلہ سیاسی مقاصد اور کردار کشی کے لیے ہے ، سیاسی انتقام کا ایجنڈا آگے بڑھانے کی کوشش کی گئی ہے۔
یاد رہے کہ اس سے قبل عمران خان اور بشریٰ بی بی کو توشہ خانہ کیس میں 14، 14 برس قید کی سزا سنائی گئی تھی جبکہ اس سے قبل سائفر کیس میں بھی عمران خان کو 10 برس قید کی سزا سنائی گئی تھی۔ عمران خان کو توشہ خانہ کیس میں 10 سال کے لیے نااہل بھی قرار دیا گیا ہے۔
