کاروبار

آئی ایم ایف ڈیڈ لائن میں 2 روز باقی، گیس قیمتوں میں اضافے کا فیصلہ نہ ہوسکا

14 فروری ، 2024

اوگرا سفارشات پر عملدرآمد سے گیس صارفین پرتقریباً 100 ارب روپے کااضافی بوجھ پڑیگا/ فائل فوٹو

اسلام آباد: گیس کی قیمتوں میں اضافے سے متعلق آئی ایم ایف کو دی گئی یقین دہانی کی ڈیڈ لائن ختم ہونے میں دو روز باقی ہیں تاہم کابینہ کی اقتصادی رابطہ کمیٹی کے اجلاس میں گیس کی قیمتوں میں اضافے کی سمری پر فیصلہ نہ ہوسکا۔

ای سی سی نےگیس کی قیمتوں سے متعلق سمری پر مزید غور کرنے کا فیصلہ کرلیا، اضافے پر ایک سال میں گیس کی قیمتیں تیسری بار بڑھیں گی اور اوگرا سفارشات پر عملدرآمد سے گیس صارفین پرتقریباً 100 ارب روپے کااضافی بوجھ پڑیگا،گیس کی قیمتوں میں اضافہ یکم جنوری 2024 سے کرنے کی تجویز ہے۔

یہ بھی پڑھیں

یکم جنوری سے گیس کی قیمتوں میں دوسرا اضافہ، عوام پر 98 ارب روپے کا بوجھ پڑیگا

نگران وزیر خزانہ ڈاکٹر شمشاد اختر کی زیر صدارت اقتصادی رابطہ کمیٹی کا اجلاس ہوا، ذرائع کا کہنا ہے کہ پیٹرولیم ڈویژن نے گیس کی قیمتوں میں اضافے کی سمری پیش کی تاہم ای سی سی فیصلے پر نہ پہنچ سکی جس کے بعد فیصلہ کیا گیا کہ سمری پر مزید غور کیاجائیگا اس کے بعد سمری دوبارہ منظوری کیلئے پیش کی جائیگی ۔

ای سی سی کی منظوری کے بعد قیمتوں کی منظوری وفاقی کابینہ سے لی جائیگی اس کے بعد اوگرا نوٹیفکیشن جاری کریگا۔

اوگرا نے اسلام آباد سمیت پنجاب اورخیبر پختونخوا کےگیس صارفین کیلئے ٹیرف میں اوسط35.13 فیصد جب کہ سندھ اوربلوچستان کے صارفین کیلئے 8.57 فیصد اضافہ منظور کیا تھا۔