23 فروری ، 2024 
راولپنڈی: بسنت کے دوران پتنگ بازی اور ہوائی فائرنگ سے تقریباً 50 افراد زخمی
23 فروری ، 2024
راولپنڈی میں بسنت کے دوران پتنگ بازی اور ہوائی فائرنگ سے 50 کے قریب افراد زخمی جبکہ ایک 65 سالہ شخص پتنگ اڑاتے ہوئے چھت سے گرنے کے باعث جاں حق ہوگیا۔
حکومتی پابندی کے باوجود راولپنڈی میں منائی جانے والی بسنت میں ”پنڈی بوائز“نے پولیس کی تمام حکمت عملی ہوائی فائرنگ اور بوکاٹا کے شور میں برے طریقے سے ناکام بنا دی۔
پولیس اور بسنت کے دلدادہ پتنگ بازوں کے درمیان شروع ہونے والی آنکھ مچولی رات گئے تک جاری رہی، ہوائی فائرنگ،پتنگ بازی، چھتیں پھلانگنے اور گلے پر ڈور پھرنے سے مجموعی طور پر50سے زائد افراد زخمی ہو گئے۔
پتنگ بازی کے دوران زخمی ہونے والوں کو ان کے ورثا پولیس کے خوف سے پرائیویٹ اسپتالوں میں لے جاتے رہے اور نہ ہی ایمرجنسی سروس ریسکیو 1122کو اطلاع کی گئی۔
دوسری جانب پولیس نے کارروائی کرتے ہوئے 300کے قریب پتنگ بازوں کو گرفتار کر کے 24 افراد سے اسلحہ برآمد کرنے کا بھی دعویٰ کیا ہے۔
ادھر بے نظیر اسپتال کی ایمرجنسی میں زخمیوں کے رش کے باعث عام افراد کا داخلہ بند کر دیا گیا اس موقع پر راولپنڈی پولیس بسنت کنٹرول کرنے میں مکمل ناکام نظر آئی تاہم کیمیکل اور دھاتی ڈور کے نقصانات سے بچانے کے لیے پولیس نے تمام فلائی اوورز پر موٹرسائیکلوں کا داخلہ بند کردیا۔
