28 فروری ، 2024 
عمران خان نے اسپیکر کے پی اسمبلی کیلئے اسد قیصر کے بھائی کو ہٹاکر دوسرا امیدوار نامزد کردیا
28 فروری ، 2024
بانی پی ٹی آئی عمران خان نے اسپیکر خیبر پختونخوا اسمبلی کے لیے اسد قیصر کے بھائی عاقب اللہ کو نامزد کیا تھا جبکہ ڈپٹی اسپیکر کے لیے پی ٹی آئی نے چترال سے الیکشن جنرل نشست پر الیکشن جیتنے والی ثریا بی بی کو نامزد کیا تھا۔
تاہم اب اطلاعات ہیں کہ پی ٹی آئی نے عاقب اللہ کی جگہ بابر سلیم کو اسپیکر کے پی اسمبلی کا امیدوار نامزد کر دیا ہے۔
اس حوالے سے ذرائع کا بتانا ہے کہ پارٹی میں عاقب اللہ کی نامزدگی کے حوالے سے تحفظات پائے جاتے تھے اور پارٹی پریشر کی وجہ سے عاقب اللہ کی نامزدگی کا فیصلہ تبدیل کیا گیا۔
ذرائع کا کہنا ہے کہ عاقب اللہ کی جگہ بابر سلیم سواتی کو اسپیکر کے پی اسمبلی کا امیدوار نامزد کرنے کا فیصلہ گزشتہ روز عمر ایوب کی عمران خان سے اڈیالہ جیل میں ہونے والی ملاقات میں کیا گیا۔
عمر ایوب نے بھی اس بات کی تصدیق کر دی ہے کہ بانی پی ٹی آئی نے خیبرپختونخوا اسمبلی کے اسپیکر کے لیے بابر سلیم کو نامزد کر دیا ہے۔
دوسری جانب اسپیکر کے پی اسمبلی مشتاق غنی نے نو منتخب ارکان اسمبلی سے حلف لے لیا ہے اور انہوں نے اسپیکر اور ڈپٹی اسپیکر کے پی اسمبلی کا انتخاب 29 فروری کو کرانے کا اعلان کیا ہے۔
یاد رہے کہ بابر سلیم مانسہرہ سے صوبائی اسمبلی کی نشست پر آزاد حیثیت میں جیتے ہیں اور وہ اگست 2018 سے جنوری 2023 تک رکن خیبر پختونخوا اسمبلی بھی رہ چکے ہیں۔
