چھکوں کی برسات، سن رائزز حیدرآباد نے آئی پی ایل کی تاریخ کا سب سے بڑا اسکور بنا دیا

انڈین پریمیئر لیگ 2024 میں سن رائزز حیدرآباد نے ممبئی انڈینز کے خلاف چھکوں کی برسات کرتے ہوئے آئی پی ایل کی تاریخ کا سب سے بڑا اسکور بنا دیا۔

راجیو گاندھی اسٹیڈیم حیدرآباد میں ممبئی انڈینز نے ٹاس جیت کر سن رائزز حیدرآباد کو پہلے بیٹنگ کی دعوت دی۔

اس دعوت کو سن رائزز حیدرآباد کے بیٹرز نے کھلے دل سے قبول کیا اور چوکے چھکوں کی برسات کرکے آئی پی ایل کی تاریخ کا سب سے بڑا اسکور بنا دیا۔

 سن رائزز حیدرآباد نے مقررہ 20 اوورز میں 3 وکٹوں کے نقصان پر 277 رنز کا پہاڑ کھڑا کر دیا۔

ٹریوس ہیڈ نے 24 گیندوں پر 62، ابھیشیک شرما نے 23 گیندوں پر 63 رنز بنائے، ایڈن مارکرم 28 گیندوں پر 42 اور ہینرک کلاسن نے صرف 34 گیندوں پر 80 رنز کی ناقابل شکست اننگز کھیلی۔

سن رائزز حیدرآباد کی اننگز میں مجموعی طور پر 18 چھکے اور 19 چوکے لگے۔ 

واضح رہے کہ اس سے قبل آئی پی ایل کی تاریخ کا سب سے بڑا اسکور روائل چیلنجرز  بنگلور نے 2013 میں پونے واریئرز انڈیا کے خلاف اسکور کیا تھا، بنگلور نے 5 وکٹوں کے نقصان پر 263 رنز بنائے تھے۔