02 اپریل ، 2024 
عمران خان اسلام آباد لانگ مارچ کے دوران توڑپھوڑ کے ایک اورکیس میں بری
02 اپریل ، 2024
پاکستان تحریک انصاف کے بانی عمران خان اسلام آباد کے تھانا مارگلہ میں درج لانگ مارچ توڑپھوڑکے ایک اورکیس میں بری ہوگئے۔
جوڈیشل مجسٹریٹ مریدعباس نے بانی پی ٹی آئی و دیگر کی درخواست بریت منظور کرلی۔ درخواست بریت پر وکلا سردار مصروف اور آمنہ علی نے دلائل دیے۔ عمران خان کے ساتھ اسدعمر اور راجا خرم نواز بھی لانگ مارچ توڑپھوڑ کیس سے بری ہوئے۔
عدالت نے فیصلے میں کہا کہ پراسیکیوشن کی جانب سے لانگ مارچ توڑپھوڑ کا وقوعہ بتایاگیا، کسی بھی گواہ کو شامل تفتیش نہیں کیاگیا۔
عدالت نے قرار دیاکہ مدعی مقدمہ اسسٹنٹ سب انسپکٹر انتظامیہ کی جانب سےنوٹیفکیشن جاری کرنےکامجاز نہیں، اسسٹنٹ سب انسپکٹر بطور مدعی مقدمہ بھی درج کرنے کا مجاز نہیں۔
عدالت نے کہا کہ سی سی ٹی وی بھی عدالت میں مہیا نہیں کی گئی، تفتیشی افسر نے بانی پی ٹی آئی و دیگر کے خلاف کوئی ثبوت پیش نہیں کیا لہٰذا انہیں بری کیا جاتا ہے۔
خیال رہے کہ عمران خان اور دیگر پر عوام اور سرکاری ملازمین کو اکسانےکی دفعات کے تحت مقدمہ درج کیاگیا تھا۔
