جمہوریت کی بحالی اور فلسطین کی آزادی کی تحریک ساتھ چلے گی، اسرائیل کو تسلیم نہیں کریں گے: حافظ نعیم

امیر جماعت اسلامی حافظ نعیم الرحمان کا کہنا ہے کہ جمہوریت کی بحالی کی تحریک اور فلسطین کی آزادی کی تحریک ساتھ ساتھ چلے گی۔

لاہور میں اقصیٰ مارچ سے خطاب کرتے ہوئے حافظ نعیم الرحمان کا کہنا تھا اسرائیل کو کبھی بھی تسلیم نہیں کرنے دیں گے، دو ریاستی حل کو کسی صورت نہیں مانیں گے۔

ان کا کہنا تھا پاکستانی عوام بھکاری نہیں ہے، ڈالروں کے عوض اسرائیل کو تسلیم کرنے کی سازشوں کو کامیاب نہیں ہونے دیں گے، ہم عوام کو جگائیں گے اور فلسطین کی آواز بن کر حکمرانوں کے سامنے کھڑے ہوں گے، ہمارے آئیڈیل وہی لوگ ہیں جو حق کی خاطر لڑ رہے ہیں۔

امیر جماعت اسلامی کا کہنا تھا موجودہ حکومت فارم 47 کی حکومت ہے، جو ہم پرمسلط کی گئی ہے، ایک طرف جمہوریت کی بحالی کی تحریک ہو گی تو دوسری طرف فلسطین کی آزادی کی تحریک چلے گی۔