30 اپریل ، 2024 
لوڈشیڈنگ کیخلاف درخواست: کے الیکٹرک کو کمرشل اور کچی آبادی کے کنکشنز الگ کرنیکی ہدایت
30 اپریل ، 2024
کراچی: سندھ ہائیکورٹ نے کے الیکٹرک کو کمرشل ایریا اور کچی آبادی کے کنکشنز علیحدہ کرنے کی ہدایت کردی۔
سندھ ہائیکورٹ میں جمشید کوارٹرز کے کمرشل ایریاز میں غیراعلانیہ لوڈشیڈنگ کے خلاف درخواست پر سماعت ہوئی جس دوران عدالت نے لوڈشیڈنگ پر کے الیکٹرک حکام پر برہمی کا اظہار کیا۔
درخواست گزار نے کہا کہ جمشید کوارٹرز کے کمرشل علاقوں میں بھی 14،14 گھنٹوں کی غیراعلانیہ لوڈشیڈنگ کی جارہی ہے، پورا دن جنریٹر چلا کر کاروبار کرنا بہت مشکل ہے۔
اس پر چیف جسٹس سندھ ہائیکورٹ عقیل احمد نے کہا کہ جو صارفین باقاعدگی سے بلز ادا کررہے ہیں ان علاقوں میں اضافی لوڈشیڈنگ زیادتی ہے۔
اس دوران کے الیکٹرک کے وکیل کا کہنا تھا کہ کچی آبادی اور کمرشل ایریا کے بجلی کنکشنز ایک ہی فیڈر پر ہیں اور علاقے میں ہائی لاسز ہونے کی وجہ سے لوڈشیڈنگ کا دورانیہ بڑھا دیا گیا ہے۔
عدالت نے کے الیکٹرک کو کمرشل ایریا اور کچی آبادی کے کنکشنز علیحدہ کرنے کی ہدایت کی اور اس پر 10 روز میں عملدرآمد رپورٹ طلب کرلی۔
