9 مئی کو تاریخ کا سیاہ باب رقم کرنیوالوں سےکوئی سمجھوتہ ہوسکتا ہے نہ ڈیل: آرمی چیف

لاہور: آرمی چیف جنرل سید عاصم منیر نےکہا ہےکہ دشمن قوتیں اور ان کے سرپرست جھوٹ، جعلی خبروں اور پروپیگنڈے سے ڈیجیٹل ٹیررازم کر رہے ہیں، 9 مئی کو تاریخ کا سیاہ باب رقم کرنیوالوں سےکوئی سمجھوتہ ہوسکتا ہے نہ ڈیل، قوم کی حمایت سے ان تمام قوتوں کے عزائم کو ناکام بنایا جائےگا۔

پاک فوج کے شعبہ تعلقات عامہ (آئی ایس پی آر ) کے مطابق آرمی چیف جنرل سید عاصم منیر نے لاہور گیریژن کا دورہ کیا اور  یادگار شہداء پر  پھول رکھے، آرمی چیف نے مادر  وطن کے لیے جانیں قربان کرنے  والے  شہدا کو خراج عقیدت پیش کیا۔

آئی ایس پی آر کے مطابق  آرمی چیف کو فارمیشن کی آپریشنل تیاریوں پر تفصیلی بریفنگ دی گئی۔

آرمی چیف نےکور ہیڈکوارٹرز میں گیریژن  آفیسرز  سے خطاب کرتے ہوئے افسران اور جوانوں کو قوم کے لیے خدمات پیش کرنے اور  پیشہ ورانہ مہارت پر سراہا۔

آرمی چیف کا کہنا تھا کہ دشمن قوتیں اور  ان کے  سرپرست جھوٹ، جعلی خبروں اور   پروپیگنڈے سے ڈیجیٹل ٹیررازم کر رہے ہیں، مسلح افواج  اور  پاکستانی عوام کے درمیان تفریق پیدا کرنےکی کوشش کی جارہی ہے، قوم کی حمایت سے ان تمام قوتوں کے عزائم کو ناکام بنایا جائےگا، پاک فوج کا  ہر سپاہی اور  افسر اپنے فرائض اور  ذمہ داریوں کو  اولیت دیتا ہے۔

please wait while file is uploading on server

آرمی چیف نے کہا کہ  پاک فوج کا ہر سپاہی اور  افسر  روزانہ کی بنیاد  پر قربانیاں دے رہا ہے، بلاشبہ 9 مئی پاکستان کی تاریخ میں سیاہ دن رہےگا، اس دن شرپسندوں نے شہدا کی یادگاروں کی دانستہ  بے حرمتی کی، اس دن شرپسندوں نے ریاست اور قومی اتحاد کی علامتوں پرحملہ کیا، پُرتشدد اور  مذموم کارروائیوں  سے پاکستان دشمنوں کو ریاست اور قوم کامذاق اڑانےکا موقع دیا گیا، اب وہی سازشی عناصر ڈھٹائی سے بیانیہ توڑ مروڑ کر ریاست کو ملوث کرنے کی کوشش کر رہے ہیں۔

ان کا کہنا تھا کہ  تاریخ کا سیاہ باب رقم کرنے والوں سےکوئی سمجھوتہ ہوسکتا ہے نہ ڈیل، لوگ مجرمانہ عناصر کے مذموم سیاسی مقاصدنہیں سمجھ سکے، انہیں منصوبہ سازوں نے اپنی خواہشات کا ایندھن بنایا، اِن ورغلائے ہُوئے افراد کو سپریم کورٹ  کی ہدایات پر پہلے سے شک کا فائدہ  دیا جاچکا  ہے۔

آرمی چیف کا کہنا تھا کہ  اس گھناؤنے منصوبےکے اصل  رہنما خود کو  معصوم ظاہر کرتے  ہیں، انہیں اب  اپنے جرائم کا حساب  دینا پڑےگا، خصوصاً  جب اُن کے ملوث ہونے کے واضح ثبوت ہیں، شہدا  اور  ان کے اہلخانہ  یا ادارے کی  بےحرمتی  کرنےکی کسی کو اجازت  نہیں دی جائےگی، 9 مئی کے منصوبہ سازوں، سہولت کاروں، مجرموں کو  ملکی قانون  کے مطابق  انصاف  کے کٹہرے  میں لایا جائےگا۔

جنرل سید عاصم منیر کا کہنا تھا کہ  آئے  روز کی جانے والی اشتعال انگیزیوں کا  جواب نہ دینے کو کمزوری  اور ہمارے صبر کو  لامحدود  نہ سمجھا جائے۔

آرمی چیف نے لاہور گیریژن میں جناح لائبریری کا افتتاح بھی کیا۔ آرمی چیف کا کہنا تھا کہ  ہم تعمیری قوت کی حیثیت سے  راکھ اور ملبےکے ڈھیر  پر پبلک لائبریری بنا کر قائد کی حرمت کو دوبارہ  روشن کر رہے ہیں۔