05 جون ، 2024 
ٹی ٹوئنٹی ورلڈکپ میں اچھی پرفارمنس کیلئے پر امید ہیں: محمد عامر
05 جون ، 2024
پاکستان کرکٹ ٹیم کے فاسٹ بولر محمد عامر کا کہنا ہے کہ آئی سی سی ایونٹ ہمیشہ بڑا چیلنج ہوتے ہیں، ہم ہر طرح کی صورتحال کیلئے تیار رہتے ہیں، ٹی ٹوئنٹی ورلڈکپ میں اچھی پرفارمنس کیلئے پر امید ہیں۔
آئی سی سی مینز ٹی ٹوئنٹی ورلڈکپ 2024 میں امریکا کے خلاف میچ سے قبل فاسٹ بولر محمد عامر نے ڈیلس میں پریس کانفرنس کرتے ہوئے کہا کہ ہم یہاں جیتنے آئے ہیں، ہمیں ہر میچ جیتنا ہے۔
محمد عامر نے کہا کہ موسم ہمارے قابو میں نہیں، ہمیں ہر صورتحال کو دیکھنا ہے، ذہنی طور پر ہم تیار ہیں۔
شاداب اور اعظم کی کارکردگی کے حوالے سے بات کرتے ہوئے محمد عامر کا کہنا تھا کہ دونوں کی صلاحیتوں پر کسی کو شک نہیں ہے، وہ اپنے دن یکطرفہ میچ جیتا سکتے ہیں،ان دونوں کو ایک فارم میں آنے کیلئے اچھا میچ چاہیے۔
انہوں نے کہا کہ بطور سینیئر پلیئر ٹیم جو ذمہ داری دیتی ہے وہ پوری کرنا ہوتی ہے، خواہش ہے کہ یہاں اچھا پرفارم کروں، نسیم، حارث، شاہین چار سال سے اچھا کر رہے ہیں۔
واضح رہے کہ پاکستان ایونٹ میں اپنا پہلا میچ کل میزبان امریکا کے خلاف کھیلے گا جبکہ پاک بھارت ٹاکرا 9 جون کو ہوگا۔
