29 جون ، 2024
اسرائیل کی فوجی عدالت نے اوون میں مینڈک کو پکا کر مارنے والے فوجی کو 4 ماہ قید اور 1500شیکل بطور جرمانہ کی سزا سنادی۔
غیر ملکی خبر رساں ادارے کے مطابق مینڈک کو مارنے کا واقعہ گزشتہ برس مارچ میں پیش آیا تھا، اسرائیلی فوجی نے یونٹ کوارٹرز کے قریب ملنے والے مینڈک کو اوون میں ڈال کر پکانے رکھ دیا تھا لیکن تقریباً 10 سیکنڈز بعد اپنے ساتھی کے منع کرنے پر فوجی اہلکار نے اوون سے مینڈک کو نکال دیا لیکن تب تک مینڈک مرچکا تھا۔
اس کے بعد اسرائیلی فوجی کے خلاف ساتھی اہلکاروں کی شکایت پر ہی جانوروں پر تشدد اور نارواسلوک پر مقدمہ دائر کیا گیا تھا، ایک سال بعد جرم کے اعتراف کی بنیاد پر اسرائیلی فوجی کو 4 ماہ قیداور 1500اسرائیلی شیکل بطور جرمانہ سزا سنائی گئی، اس کے علاوہ اسرائیلی فوجی کو بطور سزا عہدے میں تنزلی کا سامنا بھی کرنا پڑے گا۔
عدالتی فیصلے میں کہا گیا ہےکہ جو لوگ جانوروں کے ساتھ ظالمانہ سلوک اور بدسلوکی کرتے ہیں وہ صرف جانوروں کیلئے تکلیف ہی نہیں بلکہ انسانی وقار، جذبات اور عام طور پر زندگی کے تقدس کو نقصان پہنچانے کا سبب بنتے ہیں، فوجی کا مینڈک کے ساتھ برتا جانے والا رویہ ناقابل قبول ہے۔