ملک کے مختلف علاقوں میں طوفانی بارشیں، مختلف حادثات میں 10 افراد جان سےگئے

طوفانی بارشوں نے ملک کے مختلف حصوں میں تباہی مچادی  ہے، مختلف حادثات میں 10 افراد جان سےگئے، فصلوں کو بھی شدید نقصان پہنچا ہے۔

 سندھ کے شہروں حیدرآباد، خیرپور، نواب شاہ، سیہون اور دادو سمیت مختلف شہروں میں بارشیں ہوئیں۔ برساتی ریلے آبادیوں میں داخل ہوگئے،فصلوں کو شدید نقصان پہنچا،کئی نہروں کے بند ٹوٹ گئے جس کے باعث متعدد دیہات زیر آب آگئے۔

دادو میں 50 سے زائد دیہات کا زمینی رابطہ منقطع  ہوگیا، لوگ مال مویشی کے ساتھ نقل مکانی پر مجبور ہوگئے۔کھجور، کپاس اور دیگر فصلیں متاثر ہوئی ہیں۔

ٹنڈو آدم  میں روہڑی کینال میں 150 فٹ چوڑا شگاف پڑنے سے کئی دیہات زیرِ آب آگئے، مختلف شہروں میں بجلی کی فراہمی بھی معطل ہوگئی۔

بلوچستان کے ضلع قلات کے پہاڑی علاقوں سے آنے والے برساتی ریلےکا پانی گھروں میں داخل ہوگیا، نصیر آباد کے بیشتر نشیبی علاقے زیرِ آب آگئے۔

کیرتھر کے پہاڑی سلسلے میں بارش سے ندی نالوں میں طغیانی ہے، سیلابی ریلا منچھر جھیل میں داخل ہوگیا۔

ادھر لاہور میں آج پھر بارش ہوئی، شاہدرہ میں بارش کا پانی انڈر پاس میں جمع ہوگیا، شاہدرہ کی سڑکیں اور نشیبی علاقے زیرآب آگئے، پانی گھروں  اور  دکانوں میں داخل ہوگیا۔

پنجاب کے شہروں جہلم، میانوالی، گجرات، سیالکوٹ، رحیم یار خان اور حافظ آباد سمیت مختلف علاقوں میں بارش  کے باعث نشیبی علاقے زیرِآب آگئے، پانی گھروں اور کھیتوں میں داخل ہوگیا۔

عیسیٰ خیل کے پہاڑی علاقوں میں تیز بارش کے بعد برساتی نالوں میں طغیانی ہے، پشتہ بہہ جانے سے زمینی راستہ منقطع ہوگیا۔

خیبر پختونخوا میں لوئر دیر، باجوڑ، مالاکنڈ اور سوات سمیت مختلف علاقوں بارشیں ہوئیں۔

 ٹانک میں مکان کی چھت گرگئی ، دو افراد جاں بحق اور  تین زخمی ہوگئے۔ کرک میں سیلابی ریلے میں بہہ کر 4 افراد جاں بحق ہوگئے۔

 آزادکشمیر میں مظفر آباد، نیلم، حویلی، باغ اور سدھنوتی میں بھی وقفے وقفے سے بارش کا سلسلہ جاری ہے۔