صحت و سائنس

محکمہ صحت کے پی کی جانب سے کنڈومز کی خریداری میں مبینہ کرپشن کا انکشاف

06 اگست ، 2024

محکمہ صحت کے پی کی جانب سے کنڈومز کی خریداری میں مبینہ کرپشن کا انکشاف — فوٹو: فائل

پشاور: محکمہ صحت خیبر پختونخوا کی جانب سے خریدے گئے کنڈومز میں کروڑوں روپے کی مبینہ کرپشن کا انکشاف ہوا ہے۔

ذرائع محکمہ صحت کے مطابق ضروری ادویات کی مد میں محکمہ صحت نے رواں سال جنوری میں 12 لاکھ کنڈوم خریدے جس روز کمپنی کو آرڈر دیاگیا اسی روز سپلائی سے پہلے ہی کمپنی کا بل بھی پاس کرایا گیا۔

ذرائع نے بتایاکہ جنوری میں منظور کی جانے والی کنڈومز کی انوائس پر تاریخ اجرا اپریل 2024 ہے۔

یہ بھی پڑھیں

پاکستان میں آبادی بڑھنے کا بم پھٹ چکا اسے کنٹرول کرنا ہوگا: وزیر خزانہ

ذرائع کے مطابق شمالی وزیرستان کو 7 لاکھ کنڈومز اور پشاور کے متنی اسپتال کو کاغذات میں 2 لاکھ کنڈومز بھیجے گئے تاہم شمالی وزیرستان اور ڈی ایچ او پشاور کنڈومز کی سپلائی سے مکمل طور پر لاعلم نکلے۔

ذرائع کے مطابق شمالی وزیرستان میں مردوں کی اتنی تعداد نہیں جتنے کنڈومز بھجوائے گئے ہیں۔

ذرائع کے مطابق مانع حمل کے لیے مبینہ طور پر کنڈومز صرف کاغذات کی حد تک خریدے گئے ہیں، معاملے کی انکوائری شروع کردی ہے۔ ذرائع محکمہ صحت نے بتایاکہ فی کنڈوم 18 روپے 75 پیسے کے حساب سے خزانے سے دو کروڑ 25 لاکھ روپے کی ادائیگی کی گئی تھی۔

دوسری جانب جیو نیوز سے گفتگو میں ڈی ایچ او شمالی وزیرستان ڈاکٹر معراج وزیر کا کہنا تھا کہ محکمہ صحت شمالی وزیرستان کو کوئی سرکاری کنڈوم نہیں ملا، کنڈوم نہ ملنے سے متعلق انہوں نے ڈائریکٹوریٹ ہیلتھ کو آگاہ کیا ہے۔

ان کا کہنا تھا کہ شمالی وزیرستان میں 2 سے 5 فیصد تک جوڑے فیملی پلاننگ میں دلچسپی لیتے ہیں۔