09 اگست ، 2024 
کے پی حکومت نے ڈیری فارم والوں کو دودھ میں 8 فیصد پانی ملانےکی اجازت دی ہے، صوبائی وزیر
09 اگست ، 2024
خیبرپختونخوا (کے پی) کے وزیر خوراک ظاہر شاہ طورو کا کہنا ہے حکومت نے ڈیری فارم والوں کو دودھ میں 8 فیصد پانی ڈالنے کی اجازت دے رکھی ہے۔
خیبر پختونخوا اسمبلی میں تحریک التوا پر حکومتی مؤقف دیتےہوئے صوبائی وزیر خوراک ظاہرشاہ طورو نےکہا کہ صوبے بھر میں دودھ کو چیک کرنے کےلیے 583 نمونے لیےگئے، ٹیسٹ کے دوران 7 اعشاریہ 2 فیصد دودھ کے نمونے درست قرار دے دیے گئے جب کہ بقیہ دودھ میں ملاوٹ پائی گئی، حکومت نے ڈیری فارم والوں کو دودھ میں 8 فیصد پانی ملانےکی اجازت دی ہے۔
ان کا کہنا تھا کہ دودھ میں فارمولین زیادہ ڈالنے سے کینسر کے امکانات بڑھ جاتےہیں، جن دودھ فروشوں کے دودھ میں فارمولین زیادہ تھی ان دکانوں کو سِیل کیا گیا ہے۔
ظاہر شاہ طورو کا کہنا تھا کہ صوبے میں لاش کو محفوظ بنانے کے لیے استعمال ہونے والےکیمکل کو دودھ میں ملایا جاتا ہے، حکومت نے دودھ چیک کرنےکی ذمہ داری حلال فوڈ اتھارٹی کو دی ہے۔
صوبائی وزیر نے کہا کہ حکومت نے ڈیری فارم والوں کو دودھ میں 8 فیصد پانی ڈالنے کی اجازت دے رکھی ہے تاکہ دودھ میں دیگر خطرناک کیمیکلز کی ملاوٹ نہ ہو سکے۔
ایوان سے خطاب میں کمشنر پشاور کے بھائی اور حکومتی رکن اسمبلی آصف محسود نے کہا کہ حلال فوڈ اتھارٹی میں 18، 18 گریڈ کے افسران کے پاس ڈگریاں تک نہیں ہیں اور یہ محکمہ ہائی کورٹ اور صوبائی انسپکشن ٹیم کی ہدایت پر عمل درآمد بھی نہیں کر رہا، فوڈ اتھارٹی میں غیر قانونی بھرتیاں کی گئی ہیں، ان میں ایسے افسران بھی بھرتی ہوئے ہیں جنہوں نے ایم اے اسلامیات کیا ہے۔
مزید خبریں :
ملتان میں فضائی معیار آج بھی انتہائی مضر صحت
2 گھنٹے پہلے
کراچی: مٹی کا تودہ گرنے سے 2 مزدور جاں بحق، ایک زخمی
9 گھنٹے پہلے
