31 اگست ، 2024 
برازیل نے ایلون مسک کے سوشل میڈیا پلیٹ فارم ایکس پر پابندی لگادی
31 اگست ، 2024
برازیل نے عدالتی احکامات پر ایلون مسک کے سوشل میڈیا پلیٹ فارم ایکس پر پابندی لگادی۔
برطانوی میڈیا کے مطابق برازیلی عدالت نے ایلون مسک سے فیک نیوز پھیلانے والوں کیخلاف کارروائی کا مطالبہ کیا تھا، تاہم ایلون مسک نے برازیل میں اس مقصد کیلئے دفتر کھولنے سے انکار کر دیا تھا۔
برازیل کی سپریم کورٹ کے جج ایلگزینڈ موریس نے نیشنل ٹیلی کمیونیکیشن ایجنسی کو حکم جاری کیا کہ فوری طور پر ملک بھر میں ایکس کی سروسز کو مکمل طور پر بند کردیا جائے۔
سپریم کورٹ نے گوگل اور ایپل سمیت انٹرنیٹ پرووائیڈرز کو بھی ایکس ایپلی کیشنز کو روکنے کیلئے ٹیکنالوجیکل رکاوٹیں لگانے کا حکم دیا۔
برازیل میں سماجی رابطوں کی ویب سائٹ ایکس کو 22 ملین سے زائد صارفین استعمال کرتے ہیں۔
واضح رہے کہ ایلون مسک رواں ماہ کے آغاز میں ہی برازیل میں اپنے کاروباری معاملات بند کرچکے ہیں۔
انہوں نے دعویٰ کیا تھا کہ سپریم کورٹ کے جج موریس کی جانب سے کمپنی کے قانونی نمائندے کو سینسرشپ آرڈر پر جبری عملدرآمد کیلئے گرفتاری کی دھمکیاں دی گئی تھیں۔
