بیوی نے روزانہ 100 مرتبہ فون کرنیوالے شوہر کی شکایت پولیس کو لگادی، شوہر گرفتار

جاپان میں ایک انوکھا واقعہ پیش آیا جہاں ایک  شخص کو اس لیے گرفتار کیا گیا کہ وہ اپنی بیوی کو دن میں سو بار فون کرتا تھا۔

غیر ملکی میڈیا رپورٹس کے مطابق 38 سالہ جاپانی شہری کو حال ہی میں اپنی بیوی کو ایک ہی دن میں 100 بار فون کرنے پر گرفتار کیا گیا ہے، جاپان کے شہر اماگاساکی کی رہائشی خاتون نے اپنے شوہر کی شکایت پولیس کو لگائی۔

خاتون نے دعویٰ کیا کہ وہ اسے روزانہ 100 سے زیادہ گمنام فون کالز کرتا ہے یہاں تک کہ اسے اپنا فون سوئچ آف کرنا پڑتا ہے۔

رپورٹس کے مطابق 31 سالہ خاتون کو ابتدا میں نامعلوم شخص کی طرف سے عجیب و غریب فون کالز موصول ہونے لگیں جس میں کالر اس وقت تک خاموش رہتا جب تک خاتون مایوسی کے عالم میں فون بند نہیں کر دیتیں، جب یہ معاملہ کافی عرصے تک جاری رہا تو خاتون اکتا گئیں۔

خاتون کے مطابق کبھی کبھار دن میں درجنوں اور متعدد بار 100 فون آتے تھے لیکن ایک رات جب وہ اپنے شوہر کے فون پر ویڈیو گیمز کھیل رہی تھیں تو خاتون کے ذہن میں آیا کہ جب وہ شوہر کے ساتھ ہوتی ہیں تو انہیں کوئی فون نہیں آتا، یہ سوچ کر اگلے دن خاتون نے پولیس کو اپنے شبہات سے آگاہ کیا اور بلآخرپولیس نے شواہد اکٹھے کرنے کے بعد شوہر کو گرفتار کرلیا۔

جب خاتون کے شوہر سے پولیس نے پوچھا  اس نے اپنی ہی بیوی کو عجیب و غریب کالز کے ذریعے ایک ماہ تک کیوں ہراساں کیا، تو اس شخص نے سادگی سے جواب دیا کہ ’میں اپنی بیوی سے پیار کرتا ہوں اسی لیے بغیر کچھ کہے اسے فون کرتا تھا‘۔

 اماگاساکی کی پولیس کے مطابق یہ اس نوعیت کا پہلا عجیب واقعہ تھا۔