22 ستمبر ، 2024 
ملک بھر میں میڈیکل کالجز اور جامعات میں داخلے کیلئے ایم بی بی ایس اوربی ڈی ایس ٹیسٹ کا انعقاد
22 ستمبر ، 2024
ملک بھر کے میڈیکل کالجز اور جامعات کے ایم بی بی ایس اوربی ڈی ایس ٹیسٹ آج منعقد ہوئے۔
ملک بھر کے ایک لاکھ 67 ہزار سے زائد امیدواروں نے داخلہ ٹیسٹ دیا، اس موقع پر سکیورٹی کے انتہائی سخت انتظامات کیے گئے۔
ایم ڈی کیٹ کیلئے پنجاب کے 12شہروں میں 26 امتحانی مراکز قائم قائم کیے گئے، مجموعی طور پر 58380 امیدواروں نے داخلہ ٹیسٹ دیا جن میں 40364 لڑکیاں اور 18016لڑکے شامل تھے، امتحانی مراکز کے اردگرد دفعہ 144 نافذ کی گئی ہے۔
سندھ میں ایم ڈی کیٹ ٹیسٹ کی ذمہ داری ڈاؤ یونیورسٹی کو سونپی گئی، سندھ بھر سے تقریباً 38 ہزار 700 امیدواروں نے حصہ لیا جن میں سے 13 ہزار کراچی سے تھے۔
کراچی میں این ای ڈی یونیورسٹی اور ڈاؤ یونیورسٹی کے اوجھا کیمپس میں امتحانی مراکز قائم کیے گئے۔
دوسری جانب بلوچستان سے 5806 طلبا نے داخلہ ٹیسٹ میں حصہ لیا۔ بلوچستان کے میڈیکل کالجز میں داخلے کیلئے انٹری ٹیسٹ بیوٹمز میں ہوا۔
اس کے علاوہ خیبر پختونخوا سے ٹیسٹ میں 42 ہزار سے زیادہ امیدوار وں نے حصہ لیا۔ ٹیسٹ کے لیے 8 اضلاع میں 13 امتحانی مراکز قائم کیے گئے۔
