24 ستمبر ، 2024 
جسٹس منصور علی شاہ نے تنازعات کے حل کیلئے ثالثی مراکز کی تجویز دیدی
24 ستمبر ، 2024
سپریم کورٹ کے سینیئر ترین جج جسٹس منصور علی شاہ نے تنازعات کےحل کے لیے ثالثی مراکز کی تجویز دے دی۔
سپریم کورٹ کے جسٹس منصور علی شاہ اور اسلام آباد ہائیکورٹ کے جسٹس محسن اختر کیانی نے فاطمہ جناح یونیورسٹی اسلام آباد کے 2 روزہ ورکشاپ کی اختتامی تقریب میں شرکت کی۔
جسٹس منصور علی شاہ نےخطاب کرتے ہوئے کہا کہ تنازعات کا ثالثی کے ذریعے حل وقت کی اہم ترین ضرورت ہے،لگتا نہیں تنازعات کے ثالثی حل کے بغیر ہم 24 لاکھ مقدمات سے چھٹکارا حاصل کرسکتے ہیں۔
انہوں نے کہا کہ مقدمہ بازی کا سب سے اسمارٹ Alternative Dispute Resolution ( اے ڈی آر) ہی ہے، مقدمات کے مسئلے کے حل کے لیے اسی جانب جانا ہوگا، زیر التوا مقدمات اے ڈی آر سینٹر منتقل کرنے کے لیے ضلعی سطح پر اے ڈی آر سینٹر بنانا ہوں گے، شہریوں کو انصاف کی جلد فراہمی کے لیے اےڈی آر سینٹرز میں مقدمات جلد نمٹائے جا سکیں گے۔
انہوں نے مزید کہا کہ ادارے بات چیت سے پروان چڑھتےہیں، ڈسٹرکٹ اینڈ سیشن ججز کو بات چیت، شیئرنگ، خیال رکھنے کے کلچر کو فروغ دینا چاہیے۔
اس کے علاوہ اسلام آباد ہائیکورٹ کے جسٹس محسن اختر کیانی نے خطاب کرتے ہوئے کہا کہ بات چیت کرنا اہم اور ضروری ہے لیکن جج کو ریڈ لائن کو کراس نہیں کرنی چاہیے تاکہ جج کو متعصب جج نہ کہا جائے۔
جسٹس منصورعلی شاہ نے تقریب کے اختتام پر شرکاء میں سرٹیفکیٹس بھی تقسیم کیے۔
