27 ستمبر ، 2024 
بھارت بنگلادیش ٹیسٹ : اسٹیڈیم میں بندروں سے بچنےکیلئے لنگور سکیورٹی پر تعینات
27 ستمبر ، 2024
بھارت اور بنگلا دیش کی کرکٹ ٹیموں کے درمیان کان پور میں جاری سیریز کے دوسرے اور آخری ٹیسٹ میچ کے لیے لنگوروں کو سکیورٹی کے لیے تعینات کیا گیا ہے۔
شاید یہ آپ نے یہ پہلی بار سنا ہوگا کہ کرکٹ میچ کے دوران لنگوروں کو تعینات کیا گیا ہو، پر اس کی ایک منفرد وجہ ہے۔
دراصل اتر پردیش کرکٹ ایسوسی ایشن نے کان پور میں جاری ٹیسٹ میچ کے دوران بندروں کو اسٹیڈیم میں گھسنے سے روکنے کے لیے لنگوروں کی خدمات حاصل کی ہیں۔
بھارتی میڈیا کے مطابق بندر کرکٹ میچ دیکھنے کے لیے اسٹیڈیم میں پہنچنے والے شائقین سے کھانے پینے اور موبائل فون جیسی دیگر اشیاء چھین لیتے ہیں جس کی وجہ سے شائقین کو پریشانی ہوتی ہے۔
اس کے علاوہ بندر براڈکاسٹر ٹیم میں شامل کیمرہ مین سے بھی کھانے پینے کی اشیاء چھین جاتے ہیں۔
انڈین ایکسپریس کی ایک رپورٹ میں بتایا گیا ہے کہ بندر لنگوروں سے ڈرتے ہیں اس لیے حکام نے تربیت یافتہ لنگوروں کو اسٹیڈیم کے باہر سکیورٹی کے لیے تعینات کیا ہے تاکہ اسٹیڈیم میں میچ دیکھنے کے لیے آئے شائقین کو بندروں کی جانب سے کوئی پریشانی نہ ہو۔
رپورٹ میں بتایا گیا ہے کہ اسٹیڈیم میں سکیورٹی اہلکار بھی موجود ہوں گے، صرف بندروں کو اسٹیڈیم میں داخل ہونے سے روکنے کے لیے لنگروں کی خدمات حاصل کی گئی ہیں۔
واضح رہے کہ جمعہ کو شروع ہونے والے کان پور ٹیسٹ کا پہلا دن ختم ہوگیا ہے، بنگلادیش نے 3 وکٹوں کے نقصان پر 107 رنز بنائے ہیں، میزبان ٹیم کو سیریز میں ایک صفر کی برتری حاصل ہے۔
مزید خبریں :
آئی سی سی چیمپئنز ٹرافی کا ممکنہ شیڈول سامنے آگیا
3 گھنٹے پہلے
