12 اکتوبر ، 2024 
اسلحہ اور شراب برآمدگی کیس، عدم پیشی پر علی امین کو 23 اکتوبر تک گرفتار کرکے پیش کرنے کا حکم
12 اکتوبر ، 2024
ڈسٹرکٹ اینڈسیشن کورٹ اسلام آباد نے اسلحہ وشراب برآمدگی کیس میں عدم پیشی پر وزیراعلیٰ خیبرپختونخوا علی امین گنڈاپور کے وارنٹ گرفتاری برقراررکھے اور23 اکتوبرتک گرفتار کرکے عدالت پیشی کا حکم دے دیا۔
جوڈیشل مجسٹریٹ مبشرحسن کی عدالت میں علی امین گنڈاپور کے وکیل ظہور الحسن پیش ہوئے۔ اس موقع پر علی امین گنڈا پور کے گزشتہ وارنٹ گرفتاری کی بیلف رپورٹ عدالت میں پیش کی گئی جس کے مطابق علی امین گنڈاپور کے وارنٹ گرفتاری پر عمل درآمد نہیں ہوسکا۔
وارنٹ گرفتاری پر عملدرآمد کیلئے مزید ملہت کی استدعا کی گئی۔
عدالت طلبی کے باوجود وزیراعلیٰ خیبرپختونخوا علی امین گنڈاپور آج بھی عدالت پیش نہیں ہوئے۔ اس پرعدالت نے ان کے ناقابل ضمانت وارنٹ گرفتاری برقرار رکھے اور انہیں 23 اکتوبر تک گرفتار پیش کرنے کا حکم دے دیا۔
خیال رہے کہ علی امین گنڈاپور کے خلاف تھانہ بارہ کہو میں مقدمہ درج کیا گیا تھا۔
