15 اکتوبر ، 2024 
لاہور کے نجی کالج میں مبینہ زیادتی کے معاملے پر طالبہ کے والدین کا ویڈیو بیان سامنے آگیا
15 اکتوبر ، 2024
لاہور کے علاقے گلبرگ کے نجی کالج میں طالبہ سے مبینہ زیادتی کے معاملے پر طالبہ کے والد اور چچا نے ایک ویڈیو بیان میں کہا ہے کہ ان کی بیٹی سے زیادتی کا کوئی واقعہ پیش نہیں آیا، سوشل میڈیا پر احتجاج کی ویڈیوز دیکھ کر انہیں بہت تعجب ہوا ہے۔
اے ایس پی ڈیفنس شہربانونقوی کے ہمراہ ویڈیو بیان جاری کرتے ہوئے طالبہ کے چچا نے کہا کہ ہماری بیٹی کے نام پر احتجاج کیا جا رہا ہے، بیٹی گھر میں پھسل گئی، کمر میں چوٹ آئی، اس وقت اسپتال کے آئی سی یو میں زیر علاج ہے۔
انہوں نے کہا کہ میڈیکل رپورٹس پولیس کو دے دی ہیں،اپنی بیٹی کے نام پر احتجاج کی ویڈیوز دیکھ کر انہیں بہت تعجب ہوا ہے۔
اس موقع پر اے ایس پی ڈیفنس شہربانونقوی نے کہا کہ عوام غلط خبر پر کسی کے ساتھ زیادتی نہ کریں، ایسا واقعہ کسی کے ساتھ بھی ہو تو پولیس اپنی مدعیت میں مقدمہ ضرور درج کرتی ہے۔
خیال رہے کہ لاہور کے ایک نجی کالج کی فرسٹ ایئر کی طالبہ سے مبینہ زیادتی کے معاملے سے متعلق سوشل میڈیا پر کہا گیا تھا کہ کالج کا سکیورٹی گارڈ طالبہ سے زیادتی کرکے فرار ہوگیا ہے۔
سوشل میڈیا کی اس خبر پر پولیس نے سکیورٹی گارڈ کو حراست میں لیکر تفتیش شروع کر دی تھی۔
پولیس کے مطابق سکیورٹی گارڈ واقعے سے انکاری ہے اور زیادتی کے شواہد بھی نہیں ملے۔
سوشل میڈیا پر جھوٹی خبر وائرل ہونے کے بعد طلبہ اور طالبات نے لاہور میں گلبرگ مین بلیوارڈ اور کینال روڈ کو میدان جنگ بنائے دیا، مظاہرین نے شام کو احتجاج مؤخر کر کے منگل کو پھر احتجاج کی کال بھی دیدی تھی۔
دوسری طرف پولیس نے طالبہ کے باپ اور چچا کو بلا لیا، انہوں نے ماسک لگا کر اےایس پی ڈیفنس شہر بانو نقوی سامنے ویڈیو بیان ریکارڈ کروایا۔
