30 اکتوبر ، 2024 
اسلام آباد ہائیکورٹ نے ایمان مزاری اور انکے شوہر کے جسمانی ریمانڈ کا فیصلہ معطل کردیا
30 اکتوبر ، 2024
اسلام آباد ہائیکورٹ نے کار سرکار میں مداخلت کے مقدمے میں گرفتار ایڈوکیٹ ایمان مزاری اور ان کے شوہر عبدالہادی علی چٹھہ کا انسداد دہشت گردی کی عدالت سے 3 روزہ جسمانی ریمانڈ کا فیصلہ معطل کر دیا۔
اسلام آباد ہائیکورٹ کے چیف جسٹس عامر فاروق اور جسٹس ثمن رفعت امتیاز پر مشتمل ڈویژن بینچ نے انگلینڈ کرکٹ ٹیم کی موومنٹ کے دوران سکیورٹی کے لیے لگائے گئے ٹریفک روٹ کی خلاف ورزی کرنے پر بنائے گئے مقدمے میں انسداد دہشت گردی کی عدالت کی جانب سے ایمان مزاری اور عبدالہادی علی چٹھہ کے تین روزہ جسمانی ریمانڈ کے خلاف اپیل پر سماعت کی۔
درخواست گزاروں کی جانب سے وکیل قیصر امام عدالت کے سامنے پیش ہوئے اور کہا کہ درخواست گزاروں کو مقدمے میں تین روزہ جسمانی ریمانڈ دیا گیا ہے۔
انہوں نے عدالتی ہدایت پر انسداد دہشت گردی کی عدالت کی جانب سے دیا گیا ریمانڈ آرڈر پڑھ کر سنایا۔ عدالت نے ریمانڈ آرڈر معطل کرتے ہوئے پولیس کو نوٹس جاری کرکے کل تک جواب طلب کر لیا۔
خیال رہے کہ گزشتہ روز انسداد دہشت گردی عدالت نے ایمان مزاری اور ہادی علی کا تین روزہ جسمانی ریمانڈ منظور کیا تھا۔
