04 نومبر ، 2024 
بھارتی وزارت کھیل نے پاکستان میں ٹی20 ورلڈکپ کیلئے انڈین بلائنڈ ٹیم کو این او سی جاری کردیا
04 نومبر ، 2024
بھارت کی وزارت کھیل نے 23 نومبر سے پاکستان میں کھیلے جانے والے ٹی ٹوئنٹی بلائنڈ کرکٹ ورلڈکپ کے چوتھے ایڈیشن میں شرکت کے لیے انڈین بلائنڈکرکٹ ٹیم کو این او سی جاری کردیا ہے۔
بھارتی وزارت کھیل کی جانب سے کرکٹ ایسوسی ایشن آف دی بلائنڈ انڈیا کے سیکرٹری جنرل شری شائلندر یادیو کے بھیجے گئے خط میں دورہ پاکستان کی اجازت دیتے ہوئے کرکٹ ایسوسی ایشن آف دی بلائنڈ انڈیا کو دورہ پاکستان کے سلسلے میں مزیدکلیئرنس حاصل کرنے کے لیے بھارتی وزارت خارجہ اور وزارت داخلہ سے رابطہ کرنےکے لیےکہا گیا ہے۔
واضح رہے کہ بھارتی ٹیم کو ورلڈکپ میں شرکت کے لیے 1 2 نومبر کو لاہور پہنچنا ہے۔
بھارت اور پاکستان کی بلائنڈ کرکٹ ٹیموں کا میچ 25 نومبر کو لاہور میں شیڈول ہے۔
پاکستان بلائنڈ کرکٹ کونسل کے چیئرمین سید سلطان شاہ نے بھارتی بلائنڈ کرکٹ ٹیم کو وزارت کھیل کی جانب سے این او سی ملنے کو خوش آئند قرار دیتے ہوئےکہا ہےکہ پاک بھارت مقابلے ہمیشہ شائقین کھیل کی بھرپورتوجہ حاصل کرتے ہیں۔ پاکستانی عوام میں ورلڈکپ کے دوران پاک بھارت میچ کے حوالے سے بہت جوش و خروش پایا جاتا ہے۔
سید سلطان شاہ کا کہنا تھا کہ ماضی میں بھی کرکٹ ڈپلومیسی سے دونوں ممالک کے مابین تعلقات میں نمایاں بہتری آئی تھی، اقوام متحدہ کے چارٹرڈ میں بھی تمام ممالک کے ڈس ایبل افراد کو خصوصی مواقع خاص کر کھیلوں کے حوالے سے اسپیشل مراعات فراہم کرنے پر زور دیا گیا ہے۔
سید سلطان شاہ نے اس امید کا اظہارکیا ہےکہ بھارتی وزارت خارجہ و داخلہ کی جانب سے بھی انڈین بلائنڈ کرکٹ ٹیم کو دورہ پاکستان کے لیے جلد این او سی کا اجرا کردیا جائےگا۔
