09 نومبر ، 2024 
پختونخوا حکومت کی مطالبات ماننے کی یقین دھانی، پرائمری اساتذہ کا احتجاج ختم کرنے کا اعلان
09 نومبر ، 2024
خیبرپختونخوا حکومت کی جانب سے مطالبات ماننے کی یقین دھانی کے بعد پرائمری اسکول ٹیچرز نے پانچ روز سے جاری احتجاجی دھرنا ختم کرتے ہوئے پیر سے تعلیمی اداروں میں تدریسی عمل شروع کرنے کا اعلان کردیا۔
خیبرپختونخوا کے پرائمری اسکول اساتذہ اپ گریڈیشن سیمت دیگر مطالبات کی منظوری کے لیے دھرنا دیے ہوئے تھے۔ ٹیچرز اور حکومتی اراکین پر مشتمل جرگہ میں کامیاب مذاکرات ہوئے جس کے بعد ٹیچرز نے احتجاج ختم کرنے کا اعلان کیا ۔
خیبرپختونخوا حکومت نے صوبے کے پرائمری اسکول ٹیچرز کی تعیناتی کنٹریکٹ کے بجائے ریگولرائز کرنے جبکہ بھر تی کے اسکیلز بڑھانے اور پرائمری اسکول ٹیچرز کی مستقل تعینانی کا نوٹیفکیشن جاری کرنے کی یقین دھانی کرائی۔
رکن قومی اسمبلی شیر علی ارباب کا کہنا تھا کہ وزیراعلیٰ علی امین گنڈاپور نے بھی مسئلے کو حل کرنے میں خصوصی دلچسپی لی۔
ٹیچرز احتجاج کے دوران پشاور سمیت خیبرپختونخوا کے 26 ہزار سے زیادہ پرائمری اسکولوں میں تعلیمی سلسلہ چار روز تک معطل رہا جس سے لاکھوں طلبہ متاثر ہوئے۔
