18 نومبر ، 2024 
اسموگ پالیسی پر سنجیدگی سے عمل کیا جائے تو مثبت نتائج حاصل ہوں گے: لاہور ہائیکورٹ
18 نومبر ، 2024
لاہور ہائیکورٹ نے ماحولیاتی آلودگی کے خلاف پنجاب حکومت کے اقدامات کو سراہا اور پالیسیز کو اسموگ سے نجات کے لیے روڈ میپ قراردے دیا۔
لاہور ہائیکورٹ کے جسٹس شاہد کریم نے اسموگ کے تدارک کے لیے درخواستوں کی گزشتہ سماعت کا 4 صفحات پر مشتمل تحریری حکم جاری کر دیا۔
عدالت نے تحریری حکم میں لاہور میں موٹر سائیکلوں کی سختی سے نگرانی کی ہدایت کی اور قرار دیا کہ حکومت کی جانب سے الیکٹرک بسوں کی خریداری احسن اقدام ہے، الیکٹرک بسوں سے ماحولیاتی آلودگی میں خاطر خواہ کمی ہوگی۔
تحریری حکم میں کہا گیا ہے کہ ایڈووکیٹ جنرل کے مطابق حکومت نے ایسے علاقوں کی نشاندہی کی ہے جہاں درخت لگائے جا سکتے ہیں، درخت لگانے کے لیے حکومت کو نئی زمین حاصل کرنے کی بھی ضرورت نہیں۔
تحریری حکم میں مزید کہا گیا کہ حکومتی پلان کے مطابق جی ٹی روڈ، ملتان روڈ، فیروزپور روڈ پر موجود انڈسٹری یونٹس کو انڈسٹریل اسٹیٹ میں منتقل کیا جائے گا، اگر اسموگ پالیسی پر سنجیدگی سے عمل کیا جائے تو اس سے مثبت نتائج حاصل ہوں گے۔
درخواستوں پر مزید سماعت 20 نومبر کو ہوگی ۔
