دلچسپ و عجیب

کنویں میں گرنے والے شخص کی مدد کی پکار کو گاؤں والے بھوت کی آواز سمجھتے رہے، 3 دن بعد نکالا گیا

04 دسمبر ، 2024

تھائی لینڈ میں ایک شخص کو خشک کنویں میں گرنے کے 3 دن بعد کرشماتی طور پر زندہ نکال لیا گیا۔

یہ حیران کن واقعہ تھائی لینڈ کے صوبے تاک کے علاقے Mae Sot میں پیش آیا۔

مقامی پولیس کے مطابق ایک چینی شہری اس خشک کنویں میں گرگیا تھا اور اس کی مدد کی پکار کو مقامی افراد کسی بھوت کی آواز سمجھتے رہے۔

مقامی پولیس کو لوگوں کی جانب سے 24 نومبر قریبی جنگل سے عجیب آوازوں کو رپورٹ کیا گیا تھا۔

جب پولیس اہلکار اور امدادی اداروں کے افراد معاملے کی تحقیقات کرنے کے لیے جنگل میں پہنچے تو انہوں نے عجیب آوازیں سنی۔

آوازوں کا تعاقب کرتے ہوئے انہوں نے ایک چینی شخص کو دریافت کیا جو جنگل میں واقع 12 میٹر گہرے کنویں کے اندر پھنسا ہوا تھا۔

اس شخص کو کنویں سے نکالنے کا آپریشن 30 منٹ تک جاری رہا۔

اس شخص کی حالت کافی خراب تھی، بائیں کلائی ٹوٹ چکی تھی جبکہ پورے جسم پر خراشیں موجود تھیں۔

اسے فوری طور پر طبی امداد کے لیے اسپتال منتقل کیا گیا۔

بعد ازاں مترجم کی مدد سے اس شخص سے بات کی گئی تو معلوم ہوا کہ وہ 22 سالہ لیو چونیائی ہے جو 3 دنوں سے اس کنویں خوراک اور پانی کے بغیر پھنسا ہوا تھا۔

اپنی توانائی بچانے کے لیے وہ ہر گھنٹے میں صرف ایک بار مدد کے لیے چیختا تھا۔

مگر مقامی افراد ان آوازوں سے خوفزدہ ہوگئے اور انہوں نے اس کے بارے میں جاننے کے لیے کچھ بھی نہیں کیا۔

اب لیو چونیائی کی حالت خطرے سے باہر ہے اور امدادی ٹیموں کا خیال ہے کہ وہ جنگل میں بھٹک گیا تھا اور وہاں سے نکلنے کی کوشش میں کنویں میں گرگیا۔

حکام کی جانب سے کنویں کو بند کر دیا گیا ہے تاکہ مستقبل میں دوبارہ ایسا حادثہ نہ ہو۔

مزید خبریں :